Аьралуннаву къуллугъ буллалисса жула жагьилтурая рязисса барчаллагьрал чагъарду бувкIний аьралий командованиялул чулуха, хъуннасса ххаришиву дикIай нитти-буттан, мачча-гъаннан ва щалагу щарнил жяматран.
Мукун ххарисса хаварданущалсса чагъар бувкIунни уттигъанну ЦIуссалакрал шяравасса МахIаммадрасул МанаповичлучIан ва Майминат ЗайдилаевначIан, вайннал арс Чегуев МухтарахIмад­ къуллугъ буллалисса 91704-мур аьралий частьрава. Ванал командир хъунмасса барчаллагь тIий ур МухтарахIмадлул нитти-буттахь, укун ххаллилсса жагьил тарбия увну тIий.
МухтарахIмад увну ур ­2004-ку шинал ЦIуссалакрал райондалийсса ЦIуссалакрал шяраву. 2020-ку шинал къуртал бувну бур М. Исяевлул цIанийсса ЦIуссалакрал ­гимназия, увххун ур ДГУНХ-лул информациялул технологиярттал факультетрайн. Ссуттилсса призыв дайдирхьусса чIумал, ­лавгун ур ­Аьрасатнал аьралуннаву ­къуллугъ буллан.
– ХIурмат бусса МахIаммад­расул Манапович ва Майминат Зайдилаевна! Зул арс къуллугъ буллай ур дакI марцIну, цайми аьралийтуран эбратну. Ва цайнма тапшур бувмур лажин кIялану бартбигьлагьисса, ­аьралуннал низам ххуйну кIулсса, яхI бусса жагьил ур. Щак бакъар МухтарахIмад, хъиннува сивсуну, кьянкьа-кьурчIи ­хьуну аьралуннавагу зана ­хьуну, нитти-буттал чIарав ацIлай, ­аякьалий икIантIишиврийн, – тIий чивчуну бур чагъарданий.
Лажин хIадур дурссар
Имара Саидовал