ЦIуссалакрал райондалул бакIчи МаматIи ХIамзатовлул барча дунни ­райондалул жяматрахь Зумаритавал байран.
– Зумаритавал байрандалул ххишалану дакIнин бутай жунма оьрмулуву кьиматраймуния: рахIму-цIимилия, хъунаначIансса хIурматрая, кулпатрахсса аякьалия, мюхтажнансса ка-кумаграя.
Мубараксса Рамазан зуруй зумардугу дургьуну, жула иман цIакь дуллай, хъинбалартту-хъиншивуртту дан хIарачат буллай бивкIру жува. Барз къуртал хьуну махъ щукрулий хьунадакьару Зумаритавал байрангу. Ванил барачат гьарнал ужагърайн бияннав.
ЛяличIисса барчаллагь учин ччива ахIвал кIюланан кумаг буллалисса, мюхтажнал чIарав бацIлацIисса, аьвзал заманная шихуннай нанисса жула ­халкьуннал аьдатру дуручлачисса, буттал улклуй дакьаву ва аслахIшиву цIакь дан хIарачат буллалисса район­далул ­жяматрал вакилтурахь. Зумаритавал байран хъинмунил, ххуймунил дайдихьуну хьуннав, ­цинярдагу дуаьрду кьамулсса хьуннав. Гьарнал къушлий барачат ликканнав, куннан кув бувчIлай личIаннав, – увкунни ванал.

Хасъсса аьралий операция нанисса кIанттурдая Зумаритавал байран барча ­дунни ЦIуссалакрал шяравасса ­Сулайман Рамазановлул
– Ва мубараксса байрандалул кьини нава архну унугу, ттул дакIгу, пикрирдугу зущалли бусса. Буттал къатлуя архсса чIумал хъиннува бувчIлай бур жула халкь лагма лаган буллалисса рувхIанийсса аьдатирттал кьадру-кьимат. Зумаритавал байран – му жунна хьхьичI ххуттайгу, паракьатсса оьрмулувугу аьркинсса цашиврул ва цIакьсса имандалул лишанни.
Байрандалул ­барачат ­циняв­ннайн бияннав, дакIниву рахIат­шиву хьуннав, умудру-хияллу бартлаганнав. ЦIуллушиву ва ссавур чIа тIий ура хасъсса аьралий операциялул гьурттучитурал ниттихъан, хъаннин, оьрчIан. Ватандалий дакьаву, паракьатшиву хьуннав, инсантурал дянив нахIушиву, аслахIшиву хьуннав.
Хъунасса Заннал цIуллу­шивугу, ссавургу дулуннав. Кулпатирттал арарду цIакь хьуннав, оьрчIан талихI булуннав. Гьарица кьини ххарисса хавардащал духханнав зул оьрмулувун. Гьарма хъунасса Заннал урувччуну лякъиннав, – чIа кунни ванал.
Андриана Аьбдуллаева