ДакIнийхтуну барча дуллай буру ДР-лул культуралул лайкь хьусса зузала, Мариян Илиясовал цIанийсса «Дараччи» ихIсандалул фондрал член, Татам Мурадовлул цIанийсса Дагъусттаннал паччахIлугърал филармониялул директорнал хъиривмур София Разуевахь оьрмулул юбилей.
София инсантуран кIулссар дакI-аьмал хъинсса, гьарица инсаннал чIарав бацIан чялишсса, инсаншиврул бутIа ххисса, уздансса хасиятирттайну.
Ванил щала оьрму бавхIуну бур миллатрал культура хьхьичIуннай ва авадан даврицIун. Оьрмулул ва захIматрал ххуллий Софиял дурсса мюнпатсса давурттан лайкьсса кьимат бивщуну бур хIукуматралгу.
Билаятрай захIматсса тагьар хIасул хьусса ппурттуву ванил ккаккан бунни цуппа унгу-унгусса патриот бушиву. Украиннал аьрщарай хасъсса аьралий операция байбивхьуния шинмай, София аьралийтуран чялишну кумаг буллай, бюхъайсса куццуй чIарав бацIлай бур.
Ванил яхI-къириятрал, чумартсса тIуллал, дакIнил гъилишиврул чани цимилгу биян бувссар СВО-лий гьуртту хъанахъисса аьралийтурачIан.
София барча буллай, чIа тIий буру цIуллушиву, талихI-тирхханну, оьрчIал ххари буллай, дакIнин ччикун битаннав!
Дуллалимур уттиния тихуннайгу бартдигьлансса каши ва кьудрат дулуннав вихьхьун.
Мариян Илиясовал цIанийсса «Дараччи» ихIсандалул фондрал президент Гульшан Хасаева
Ца ттигу лахъазан
Медициналул элмурдал доктор, профессор, Москавуллал Стоматологиялул ва челюстно-лицевой хирургиялул научно-исследовательский институтрал хьхьичIунсса элмийсса зузала Аьшуев Жаруллагь Аьбдуллагьлул арс уттигъанну ивтунни цува зузисса РМАНПО-лул (Российская медицинская академия непрерывного профессионального образования) аьмсса ва хирургиялул стоматологиялул кафедралул хъунаману.
Жаруллагь къакIулсса чансса бухьунссар медициналул, цIуллу-сагъшиву дуруччаврил аралуву зузиминнаву. Ххуйну кIулссар ванал цIа спорт ххираминнангу. Ванал хIурмат хъунмассар лакрал, дагъусттанлувтурал дянив. Медициналул элмулул ххуллийсса лайкьшивурттацIун ва лахъазаннацIун, Жаруллагь хъанахъиссар Дагъусттаннал бадминтондалул федерациялул президентгу, Аьрасатнал бадминтондалул национал федерациялул советрал Ухссавнил Ккавкказуллал федерал округрайсса вакилгу. АцIнияхъайсса шинну хьуну дур ванал Москавлив «Доктор Джордж» тIисса хъинну сийлийсса Стоматологиялул ва эстетический косметологиялул центр тIивтIуну.
Жаруллагь ур Москавуллал ва дазул кьатIувсса яла сий думи клиникардай пишалул усттаршиву лахъ дурсса, ка сававсса хIакин, цIа дурксса вузирдаву тIалавсса аьлимчув. Лакрал райондалийсса хъун дакъасса Хъуннащиял шярава хьхьичIунсса билаятирттайн ияннинсса лахъисса ва яргсса ххуллу бивтсса, яхI-къирият дусса зунтталчув. Жаруллагьлул гьунарду чIявур, миннуя цIана къатIунна. Ванащал бувсса кутIасса ихтилатгума чIявусса затру лахьхьинсса, оьрмулул дарсну хьунсса бикIай. ЦIанихсса академиялуву укун жаваблувсса къуллугъ лаккучувнайн тапшур баву му хъунмасса, ххари хьун, пахру бан бучIисса ишри. Жаруллагь Аьбдуллагьович лагу-лайкьссар.
ДакIнийхтуну барчагу уллай, чIа тий буру чIярусса хьхьичIуннайшивуртту ва лахъазанну. Мунияргу бюхттулми шачIанттайнгу лавхъун ккакканнав, бюхълай личIаннав.
Андриана Аьбдуллаева
