Ларгсса нюжмардий МахIачкъалалив хьунни ­оьруснал культуралул ­Республикалул байран «Масленица».

Ва кьини Оьруснал театрданул хьхьичIсса майдан оьрчIи-чIюлу бувну бия республикалул циняв шагьрурдая ва цаппарасса районная бувкIсса творчествалул коллективирттал. Республикалул хъуншагьрулул кIичIиртту лавсун най бия ва байрандалуцIунсса музыкалул ва балайрдал чIурдал. Архнияра ришлай дия цIуну шавхьсса ххюлтIурдал кьанкьгу. Туну, ци масленицар дикIайсса ххюлтIурду бакъасса.

Ва шадлугъ хIадур дурну дия Дагъусттан Республикалул Культуралул министерствалул, Республикалул Халкьуннал творчествалул къатлул МахIачкъала шагьрулул администрациялул, Дагъусттан Республикалул ХIукумат чIарав дарцIуну ва республикалул муниципал сакиншиннарду гьурттуну.
БавтIми барча буллалисса ихтилатру бунни Дагъусттан Республикалул национальный политикалул ва диннал иширттал министрнал буржру биттур буллалисса Тамирлан АбутIалимовлул, культуралул министр Зарема Буттаевал, МахIачкъала шагьрулул бакIчи Жамбулат Салавовлул.

Байран цурда дайдирхьунни 160-нния ливчусса инсантал гьурттусса хороводрайну. Гихунмай сахIналийн бувккунни Дагъусттаннал паччахIлугърал ссихьрал театрданул, МахIачкъала, Хасавюрт, Къизлар, Каспийск, Дарбант, Дагогни шагьрурда­ясса, Къизлардал, Тарумовскаллал районнаясса творчествалул коллективру.
Ва хьунни Аьрасатнал Халкьуннал цашиврулмурну баян бувсса шинал лагрулийсса халкьуннал мяйжаннугусса байран – кIи тIайла дуккаврицIун дархIусса ­оьруснал байран.
Бадрижамал Аьлиева