Хасъсса аьралий операция байбивхьуния шинмай аьрайн тIайла буккан хъамул чирахъру буллай, къертту щашлай ва цаймигу гуманитар кумагру буллай бусрав хьусса ЦIуликъяннал шяравасса Ильясовхъал кулпатрая чIявучин бавссар.

ЗахIматсса кьурукIинтнил чIумал вайннал чирахъру бия яла тIалавми, ххуйну лахъайсса ва ххуйсса гъилишиву дулайсса буну тIий. Цаламур ичIаллиягу, чIаххувсса квартиралиягу ду­ссукъатта бувну, цацIунма цаймигу лагма лаган бувну зий, хъуннасса чирилул даву дуллай буссар вай хIакьинусса кьинигу.Илиясовхъал вай шиннардил дянив аьрайн тIайла дуркмунил хIат-хIисав дан къахьун­ссар. Цикссагу аьралийтал вайннахь барчаллагь тIисса роликругу ппив хьуну дур соцсетирдаву. Хасъсса аьралий операциялийн гуманитар кумаг биян бан нанимигу бучIай вайнначIату кьай ласун, отпускалий бувкIсса аьралийтал цивппагу, бучIай аьралийтурал нину-ппугу.
– Аьркинмунил хъирив увкIсса цаягу инсан жучIату тачIав ачIа къалавгссар.Жу даву дацIан ритлай бакъару, мунияту дулунмургу чан къашай, – тIий бур Маржи. Мяйжаннугу, та бучIарчагу, вайннал квартира аьрайн тIайла буккан хIадур бувсса къуршал бувцIуну бу­ссар. Цал ва кIийлва къалавгссар гуманитар кумаг биян бан Маржи цуппагу Мариуполлайн, Бердянскалийн, Токмакрайн бияннин. Вай гьантрайгу «Союз нации и народов России» тIисса щалагу Аьрасатнал жяматийсса организациялул региондалул каялувчи Камил МахIаммадовлущал «Дари добро» тIисса Дагъустт­аннал ихIсандалул группалул хъунмур Сидрат Аьлибекова ва Маржи зана хьунни Донецкаллал областьрая. Ва ряххийлчинсса аьрххир Маржил хасъсса аьралий операция нанисса кIанттурдайнсса. ЦIанасса аьр­ххилий цалчин вай лавгунни Харцызск тIисса шагьрулийн, шикку «Добрые сердца» тIисса проектрал лагрулий Ватан дуруччул кьинилун хасну дуллалисса мероприятиялий гьур­тту хьун.Шиккун оьвкуну бия аьралий иширттаву мушакъат хьу­сса Донецкаллал аьралийтурайн ва мушакъатсса оьрчIайн. Вайннан ххаллилсса бахшишру ду­нни жула душваврал. Аьралийтурал вай бусраврай кьамул бу­нни ва дакIнийхтунусса барча­ллагь увкунни. Шичча гуманитар кумагращал вай бувкIунни жула аьралийтурачIан – 102-мур бригадалул медициналул роталувун.Вайннахь бия МахIачкъалаллал 66-мур школалул дуклаки оьрчIаясса чагъардугу. Бутт­ал кIанттул цIанийсса Хъунмасса дяъвилул шиннардий кунма, хIакьинугу къинттуллух хъу­ннасса хъар лавхъун бур Маржи кунмасса чумартсса, чувшиврул бутIа буллусса дагъусттан душру. ЦIуллушиву дулуннав. Дяъвилун ахир хьуннав, жула аьралийталгу сагъ-саламатну зана хьуннав.

Андриана Аьбдуллаева