Ттигъанну «Матч ТВ-лий» тIайланнасса трансляциялий ккаккан дурунни «Анжи-Ареналий» хьусса «Fight Nights» турнирданул дачIифинал. Ва жула билаятрай машгьурсса ММА-лул шоулул промоутер ур лакку оьрчI, Ккурккуллал шяравасса Камил ХIажиев.

Шоу ккаркми кIицI лаглай бия ларайсса сакиншинна. Нара ххал къадарчагу, cоциал сетирдавусса Лакрал театрданул режиссер ва артист Руслан Лариннул контентрайхчил кIул хьунни ва шоулул давриву къачIивисса захIмат гьунар ххисса жула жагьилналгу бивхьуну бушиву.

– «Fight Nights» турнирданийн на бакIрайн агьра ца чулуха хаварбакъулий, ца чулухагу хавар буну. Ттул коллега, «Fight Nights» турнирданул шоулул режиссер Анна Веллингтоннущал жу мукьра шинай зий бивкIссару Москавлив мюзиклдануву. «Fight Nights» турнирданул режиссерну зий Аннал ацIния ряхра шинни. Жул уртакьшиву дурцуна на Дагъусттаннайн зана хьуну махъ. Амма дахIаву дуцан къариртссия. «Fight Nights» турнир Дагъусттаннай цалчин дурссар 2017 шинал. Гьашинугу вайннал хIукму бувну бия турнирданул дачIифинал дан МахIачкъалалив «Анжи-Ареналий», мунил трансляциягу «Матч ТВ-лий» тIайланна ккаккан дуллай.
Гьамин, Анна Веллингтоннущалсса дахIаврил увцунна на машгьурсса шоулий гьуртту хьун. Ттунма ккавккунни цала даврил буржру кIулсса командалул лахъсса даража.

Пахрулий ура мукьра шинай ттущалва ца сахIна кIибачIлай бивкIсса даврил уртакь хьхьичIунсса спортивный режиссер шаврия. Анял махъру тикрал бан, на таничIа ичIува хьура турнирданий, та тIурча –ттучIа ичIува Дагъусттаннай. Барчаллагьрай ура Анна Веллингтоннуйн, укунсса лагрулул даву ттуйнна вихшала даврихлу.
Шоулул режиссертурал командалуву гьуртту хьун нясив шаву ттун хъунмасса тIайлабацIур, опытри.

Зулайхат Тахакьаева