Мартрал 10-нний хьунни Аьрщив мюнпатну ишла даврил масъаларттан хасъсса ХIукуматрал комиссиялул батIаву. «Муниципал сакиншиннардал бакIчитурал давурттан кьимат бищун аьркинссар миннал аьрщив мюнпатну ишла даврих бурувгун», – увкунни Сергей Меликовлул.
Шикку гьаз бунни аьрщарал участокру арендалий дулаврил масъала.
Анализ даврил чIалачIи бувну бур муниципалитетирттал ишла буллай бушиву личIи-личIисса журардал договорду, амма ми цинявннуву чивчуну бакъасса бур арендаторнал бакIрайн лавсмур ва жаваблувшиву.
Цинявннал ца журалийсса договорду чичаву мурадрай, вице-премьер – аьрщарал ва хъус-хъиншиврул арардал министр Заур Эминовлул бувсунни муниципалитетирттайн тIайла дуккан аьркинну душиву аьрщарал участок арендалий дулаврил хIакъиравусса ца журалул (типовая) форма, му цурдагу хIадур дурну дур профильсса министерствалул.
Ва документрай личIину ккаккан дурну дур арендаторнал жаваблувшиву, договорданул шартIру лиян даврихлуссагу хIалану.
Агана ми цинярда тIалавшинну цинявннан цасса формалий цIакь дурну духьурча, муниципалитетирттал бакIчитал буржлув хьунтIий бур ми цинярда шартIру дуручлан ва аьрщив аьркинсса даражалий ишла даврихлу жаваблувшиву бакIрайн ласун, так республикалул ва федерал хъусну хъанахъисса аьрщив личIаннин.
«Муниципал сакиншиннардал бакIчитурал давурттан кьимат бищун аьркинссар миннал аьрщив мюнпатну ишла даврих бурувгун», – увкунни Сергей Меликовлул.
Билаятрал Аьрщарал кодексраву дахханашивуртту дурну дур. Гьашину мартрал 1-нния шийннай зузи дуллай бур аьрщарал участок ишла даврил (освоения зем.участка) цIусса мяъна. Утти мивун духлай дур аьрщарал участок ишла дуллан хьхьичI му хIадур дувансса мероприятияртту даву.
Аьрщи ишла даврил (освоениялул) чIун ккаккан дурну дур 3 шин.
Надзорданул органнахь дикIан тIий дур участокру хIадур даврин ва ми ишла даврин кьимат бищайсса ихтиярду.
ДР-лул Росреестрданул управлениялул каялувчи Арсен ПирмахIаммадовлул бувсунни аьркинну бушиву аьрщарал участок арендалий ласаврил договордацIун ялун ххи дурсса рязишиврул кьутIирдугу дуван. Микку балжину ккаккан дуван аьркинну дур цIусса законодательствалийн бувну арендатортурал аьрщарал участокру хIадургу дурну, ишлагу даврил хIакъираву бакIрайн ласласимур.
Шикку бувсъсса цинярда предложенияртту ххал дигьин тIий дур ХIукуматрал комиссиялул зузи группалул яла гъансса чIумал, муния махъ кьамул бантIий бур балжисса хIукмурду.
ХIадур бувссар ХI.Аьдиловлул
