ЦIуссалаккуясса Зайнуттиннул арс Султанов Рашид дуклай ур МахIачкъалалив 52-мур школалий 7-мур классраву. Ва футбол ххирасса оьрчI ур. Рашидлун суратру дихьлангу ххирар. Шин хьуну дур Художествалул школалийн занай. Ванал преподаватель Евгения Ивановна бур цала учениктураву ва уттива ца яла вихшала дишинма ур тIий.
Рашидлул нину Оксанагу творчествалул инсан бур, ва зий бур Лакрал радиолул редакциялий, «Дагъусттан» ГТРК-лий, лакку мазрайсса телепередачартту дачин дуллай. Сурат дишаврил гьунар ниттирссия бивхьунссар тIий бур. Оксанал ссу Раби Аьлиева Германиянаву, Европанаву машгьурсса аквалерист бур. Бусан аьркинни Оксана ва Рабият лакрал чичу, журналист Сулайман Чугуевлул душру бушивугу.
Рашидлун ххирар луттирду ккалан, ххирар математика. Ванал хиял бур архитектор хьунсса. «Гъинтнил каникуллу цукун гьан дуванна?» – тIисса суалдану­хьхьун жаваб дуллай, ванал бувсунни, луттирду ккалай ва футболданийн занай гьан дувантIишиву. Ва, сант дагьарча, лагерьданийнгу гьантIишиву. Ванан къаххирар аьдада чIун гьан дуллан, уттизаманнул чIявуми оьрчIру куна, телефондалувун, компьютерданувун кьувтIуну щяикIан. Ва щиривкIуну щурущисса оьрмулул бущилул дус ур. Ххирар ванан ЦIуссалаккуйн, нину-ппу хъуни хьусса кIанттурдайн, занангу. Гьай-гьай, оьрчIал оьрчIшиву авадан давриву нитти-бутталмур биялагу бакъа бакъассар.
Рашидлул ппу, ЦIуссаккулатусса Зайнуттин, милицанал подполковник, 1999 шиналсса дяъвилул ветеран, Чувшиврул ордендалунгу лайкь хьусса багьадура, ччяни дунияллия лавгун ур. Таний Рашидлун мукьра шин диркIун дур. Оксанал, виричусса буттал кIанугу бувгьуну, хIарачат бувну бур ванал оьрму ххуйсса асардал ярг буван. Ттун хIисав хьунни Рашидлун цалла суратру ришлан къаххирашивугу. Ниттищал рищун рязи шайшиву. Ва гьунар бусса оьрчIан жувагу чIа учинну оьрмулул ххуллий тIайлабацIу! Бартлаганнав архитектор хьун ччисса Рашидлул хиялгу!
Рашид Султановлул дирхьу­сса суратру

«ЧIимучIали» хIадур бувссар ПатIимат Рамазановал