Уттигъанну жуна бусравсса ва хIурмат бусса Аьбдуллаев Ссапарбаг Аьлиевич лайкь хьунни Аьрасатнал Федерациялул Жяматийсса палаталул яла лахъмур награда хIисаврай дулайсса «За заслуги перед обществом» тIисса медальданун.

Ва награда Ссапарбаг ­Аьлиевичлун дуллунни ва зуруй хьусса ДР-лул Жяматийсса палаталул 9-мур созыврай. Лакрал миллатрал дянив акъассагу, вайми миллатирттангу ххуйну кIулссар Ссапарбаг Аьлиевичлул республикалул оьрмулуву дурсса ва дуллалисса чялишсса гьурттушиндарая.

Гьашину июльданий 20 шин хъанахъиссар Дагъусттаннал Республикалул Жяматийсса палаталувун циняв миллатирттал чулухасса, агьалинал мурадру буруччавриха зузисса ва Граждан институтравунсса вакилтал бувчIуну. Лакрал агьалинал чулуха увчIусса Ссапарбаг Аьлиевич ДР-лул Жяматийсса палаталул вакилну уссар 2006 шиная шинай. Ва акъассагу лакрал миллатрал чулуха Дагъусттаннал Жяматийсса палаталул 9-мур созывравун мукуна увчIуну уссар, хьхьичIава ДР-лул шяраваллил хозяйствалул министрну ивкIсса МахIаммадов ­Айгун Халидович ва «Жизнь без слез» цIанилусса сакиншиндарал сиптачи ХIамзаева Аьйшат АхIмадбадавиевна.

Цала оьрмулул захIматрал ххуллий чIяру-чIярусса хьхьичIунсса наградарттан лайкь хьусса Ссапарбаг Аьлиевичлун Аьрасатнал Федерациялул Жяматийсса палаталул бивщусса ва лахъсса кьиматгу барча буллай, жулагу, «Илчилул» буккултрал ва миллатрал цIаниягу чIа тIий буру цIакьсса цIуллушиву, каши-кьудрат ххи шаву ва дуллалимуниву тIайлабацIу!

Залму АьбдурахIманова