Гъази-Гъумук автопробеграйну ва шадлугърайсса митинграйну кIицI ларгунни Аьрасатнал Ттугълил Кьини.
Автопробеграй гьуртту хьунни Аьрасатнал ттугъ лавчIсса чIявусса машинартту. Вайннуя сакин хьусса колонна, лакрал дазуя дарчуну, ЯтIул ламуя шиннай, Гъухъалла-къурух шихуннай, Гъази-Гъумукун дурххун, паччахI-ххуллийх най, дарцIуна дяшагьрулуву, Буттал КIанттул цIанийсса Хъун дяъвилий гьуртту хьуминнан дацIан дурсса гьайкалданучIа, митинг дуван нанисса кIанай. Шикку бавтIминнал хьхьичI ва кьинилун хасъсса, райондалул каялувшиндарал чулуха бавтIми барча буллалисса ихтилат бунни райондалул администрациялул бакIчинал хъиривчув Абубакар Къюннуевлул:
– ПаччахIлугърал ттугъ – му жулва билаятрал агьамми лишаннавасса цар. Ванил жува цачIун буллалиссару, жунма Аьрасатнал бюхттулсса тарихгу, жула ттаттахъал виричувшивугу дакIнин дутлатиссар. ХIакьину жува яла-яла пахрулий буссару цалва бурж дакI марцIну щаллу буллалисса жулва аьралийтурая, – увкунни ванал, цалва ихтилат къуртал буллай.
Хъирив ванал ва СВО-лул гьурттучи, «Память Гор» жяматийсса организациялул Лакрал райондалийсса отделениялул председатель Юнус Эфендиевлул Аьрасатнал гимнрахун лахънийн гьаз бунни Аьрасатнал Ттугъ. Ва кьинилул шадлугъирттал лагрулий хьусса иширттавух бия Аьрасатнал Федерациялул гражданиннал паспорт булавугу.
Аьрасатнал Ттугълил Кьинилул шадлугъ щаллу хьунни оьрчIал дурсса къавтIавурттайну ва дурккусса назмурдайну.
* * *
Аьрасатнал Федерациялул Ттугълил Кьини кIицI ларгунни Гъумучиял оьрчIал багъравугу. Группардавусса оьрчIру тарбиячитурал кIул бунни Аьрасатнал паччахIлугърал лишаннащал, оьрчIан хIаз бизансса куццуй бувсунни вайннул тарихрая. ОьрчIал дурккунни Ватандалухасса, ванил ттугълихасса назмурду. ОьрчIал багърал зузалтрал хIадур дурну дия ва кьинилуцIун дархIусса суратирттал конкурсругу. Уку-укунсса давурттал, щак бакъа, кумаг буллалиссар оьрчIан мюрщинияра лахьхьин ва лаласун паччахIлугърал символикалуцIун дархIумур, тарихравусса агьамсса ишру, кьинирду ва вайннул мяъна-мурад, оьрчIаву бизлазиссар ватандалухсса ччаврил ва ватандалул тарих лахьхьаврихсса гъирарал гьану.
Бадрижамал Аьлиева
