Гъумучиял оьрчIал библиотекалий хьунни Аьрасатнал Халкьуннал цашиврул шин тIитIаврин хас дурсса шадлугъ. Ваний гьуртту хьунни райондалул шяраваллал библиотекарттал ва культуралул къатрал зузалтгу.
Дайдихьу хьунни Аьрасатнал гимнрая. Шадлугъ дачин дурну бия С. Габиевлул цIанийсса Халкьуннал театрданул режиссер Шамсият Какваева. Ванил бавтIминнахь кутIану бувсунни ва байрандалия, дакIнин бувтунни, Аьрасатнал президент Владимир Путиннул хIукмулийн бувну, 2026-ку шин баян бувшиву Аьрасатнал Халкьуннал цашиврулмурну. Ва сипталия циява тIурчаннив, кIицI лаганну ларгсса шинал Кремлилуву хьусса Миллатирттал дянивсса арардал советрал заседаниялий ва пикрилущал увкшиву Щалагу Аьрасатнал Казачий обществалул атаман Виталий Кузнецов, ванал увкумургу билаятрал бакIчинал хIисаврайн лавсшиву.
Шин Аьрасатнал Халкьуннал цашиврулмурну баян баврил мурадгу бур жулва хъунмасса билаятрал чIяву миллатирттал дянивсса дусшиврул арарду цIакь даву, цал ххишалану дакIнин бутаву куннан кув бувчIлачIаврил, цайми культурардал хIурмат бушиврул цуксса агьамшиву дуссарив.
М. Дандамаевал цIанийсса ОьрчIал искусствардал школалийн заназисса душваврал дурккунни лакку мазрайсса назмурду. Балайрду увкунни АьлихIажи Щамхаловлул ва Нажвадин Халиловлул.
Ва шадлугъран хасну хIадур дурну дия луттирдал выставкагу.
Бадрижамал Аьлиева
