Майрал 24-нний Дагъусттаннал бакIчи Сергей Меликов увкIунни Каспийскаллал «Анжи-Ареналий» нанисса Щалагу Аьрасатнал гьаннарал яттил ва цIурттал выставкалийн. Республикалул бакIчинал ххал бунни жинсирал ятту, ихтилат бунни экспертътуращал.

Шикку бусравсса хъамалну бия статс-секретарь, АьФ -лул шяраваллил хозяйствалул министрнал хъиривчу Максим Увайдов, Аьрасатнал промышленностьрал ва машлул министрнал хъиривчу Олег Бочаров, Аьрасатнал цIа дурксса аьлимчу, РАН-далул академик, АьФ-лул Яттиха зузиминнал национал союзрал президент Харон Амирханов.
Площадкарттай дузал дурну дия 7 национал хIаят. Выставкалий дирхьуну дия халкьуннал художествалул касмурдал чIюлушиннарду ва цаймигу затру, миллатирттал дукия, балайрду тIий, къавтIавуртту дуллай бия фольклорданул группарду.
Дагъусттаннал дакъасса, цалла хIаятру дузал дурну дия Ставрополлал крайрал, Къабардин-Балкьарнал ва Къалмукьнал республикарттал.
Выставкалул тематикалул хIакъираву тIурча, Дагъусттанналгу ккаккиялун бивхьуну бия жулами жинслил ятту. ХIакьину региондалий лувгъи буллай бур 12 журалул жинсирал ятту. Аьлимтал ва хозяйствартту зий бур селекциялул давурттаха.
Республикалий выставка хъанай дур кIилчин. ДукIумур выставкалий ххув хьуна Къалмукьнал ва Дагъусттаннал шяраваллил хозяйствалул предприятияртту.

Дагъусттаннал бакIчинал жавабру дуллунни журналистътурал суаллахьхьун.
Региондалул бакIчинал барчаллагь кунни Аьрасатнал Шяраваллил хозяйствалул министерствалухь республикалуцIун кабакьу буллалаврихлу.
– Дагъусттаннай выставка дуллай бушиврул цал ттигу буслай бур жулла республика ятту ябаврил чулуха хьхьичIуннаймунин ккаллину душиву, – куна Сергей Меликовлул.
Выставкалиясса асардал хIа­къираву Сергей Меликовлул куна:
– Шикку бюхълай бур ккаккан личIи-личIисса продукция, ххал дуван миллатирттал хIаятру.
Выставка дур хъинну мюнпатрансса, мунияту ва дулланну гьар шинахгу. Жу кьутIи дуварду Аьрасатнал Минсельхозращал 25-мур выставка цIунилгу Да­гъусттаннай даврил хIакъираву. ХIадур хъананну жула бюхъурду ялунгу гьарта-гьарза буллан. Жун ччай бур шяраваллил хозяйствалул дакъасса промышленностьрал производствалул затругу дишин ккаккиялий, организациярдал ва предприятиярттал дянив соглашенияртту, кьутIирдугу дуллан. Ттул пикрилий, юбилейрал выставка хьунссар Аьрасатнал хъунмасса форумну, – куна Сергей Меликовлул.
– Жура чIярусса кьай дуккан дуллай буру, чIявусса ятту лувгъи буллай буру, ххяххияртту дугьлай буру, амма иширайну занакьулу даву(переработка) лайкьсса даражалий дакъар. Мунийн хъар хъанай дур муштаритурансса продукт, ттучаннал яла ххуйми чIамурдайсса кIанттурду, экспорт. Му чулуха цалсса захIматшивуртту дур, муниха зий буру, амма аьркинну дур масъала бакIуйн буккан бансса чIун. ХIакьину жу буллай буру яттил дикI занакьулу дайсса предприятие.
Дур цамургу захIматшиву – ппал занакьулу къадуллалаву. Мунийну жун багьну бур импорт ишла дуллан.
Жулла производство душиву му бюджетравун доходру дучIан дуллансса ца ттигу ххуллур, – куна Сергей Меликовлул.