Майрал 25-нний Каспийскалий къуртал хьунни Щалагу Аьрасатнал гьаннарал яттил ва цIурттал 24-мур выставка.
Ваний гьуртту хьунни Аьрасатнал 12 региондалиясса 60-нниха лирчусса хозяйствартту, миннувух дия Запорожскаллал ва Херсоннал областирдалссагу. Выставкалий бия 400-нниха ливчусса личIи-личIисса жинсирдал ятту ва цIуртти.
Выставка лакьаврил лагрулий тамашалун бувкIминнал дянив дурххунни багьлул ххирасса призру. Бухлай бия ккаккиялун бивхьусса ятту. Бувххунни 11 ку ва хIайвантран ярма ласунсса 10 сертификат.
Шиккура выставкалул лауреатътуран ва гьурттучитуран ведомствалул наградартту дуллуна Аьрасатнал Минсельхозрал ятту ябаврил ва гьаннарал иширттал департаментрал директор Дмитрий Бутусовлул. ДР-лул вице-премьер Нариман Аьбдулмуталибовлул дуллуна Республикалул ХIукуматрал наградартту.
Выставка сакин даврил наградартту дуллуна хIухчалтран, яла хьхьичIунми яттил даврил пишакартуран. Яла жагьилма хIухчу ия 12 шинавусса дагъусттанлув МахIаммад Хайбуллаев. Ванан дуллуна АьФ-лул Овцеводтурал национал союзрал ХIурматрал грамота, захIмат ххирашиврухлу ва хьхьичIунну зузаврихлу. Наградартту ларсуна ялагу Дагъусттаннал хозяйстварттаву зузисса 14 хъунама хIухчил.
Выставкалул хъунмур приз – цалчинмур даражалул диплом, гьаннарал ятту ябаву лядуккан даврил яла ларайми ккаккиярттахлу ларсуна Гъуниннал райондалул «Агрофирма «Согратль» СХК-лул председатель АьбдурахIман Чураевлул.
Мероприятиялул ахирданий Дмитрий Бутусовлул цинявннахь барча дурна шяраваллил хозяйствалул мероприятие къуртал шаву.
БавтIми барча буллалисса махъ лавхъуна Нариман АьбдулмутIалибовлулгу.
ХIасан Аьдилов
