Февральданул 4-нний Дагъусттаннал шяраваллил хозяйствалул ва бакIлахърулул министр Шамил Рамазанов гьуртту хьунни щалагу Аьрасатнал агрономтурал батIаврий. Ва хьунни Москавлив Тимирязев центрданий Аьрасатнал шяраваллил хозяйствалул министрнал хъиривчу Андрей Разиннул каялувшиврий.

Мероприятиялий гьуртту хьунни мукунма АьФ-лул Шяраваллил хозяйствалул министерствалущал ара дусса (профильные) депортаментирттал каялувчитал, АПК-лул управлениялул регионнал органнал, отраслирдал союзирттал ва бизнесрал вакилтал.

БатIаврил хъунмур тема дия ххяххияртту дугьавриву хъуннасса агротехникалул проект бартдигьаву. Мунил хъунмур мурад бур производствалул мюнпат хъун баву ва бакIлахъру ласаврил багьа (себестоимость) ялавай баву. Проект бартдигьаврийну кумаг хьунтIий бур сахъла дуван ва лахъ дуван аьрщарал ххяххияртту дугьаймур къатлил (почва) оьргъашиву, хьхьичIуннайшиву хьун дуван селекциялуву ва гьанна ласавриву, оьргъашиву ва ххяххияртту дуруччайсса затру ишла давриву ва цаймигу давуртту бартдигьавриву.

Андрей Разиннул тIимунийну, аьрщарал ялувмур къат ядаву ва мунил оьргъашиву ларай даву – му производствалул гьану хъанай бусса бур, аьркинну дусса дур мюнпатну ишла дуллан думи аьрщарал луртанну.

Климат баххана хьусса ­тагьардануву агьамшиву дусса дур шяраваллил хозяйствалул ххяххиярттал цIусса, перспективсса сортру ва гибридру дуккан давриву ва анаварсса селекциялийн бучIавриву. ЦIусса оьргъашивуртту ва ххяххияртту дуруччайсса затру дуккан дуллалийни къулагас дуван аьркинну бур шяраваллил хозяйствалул ххяххиярттал бакIлахъия гьарза даврих ва агрохимикатру ишла баврия экономикалун мюнпат ххишала баврих. Цамургу агьамсса ххуллу хьун аьркинну бур цIусса пилотътал бакъасса авиациярттал системартту, тракторду, комбайнну буккан баву ва мукунма ми ишла бувансса алгоритмарду хIадур даву.

ХIасан Аьдилов