МахIачкъала шагьрулул 49-мур школалул директор Аьбдулкарим Айгунов увкIунни хасъсса аьралий операциялий гьуртту хъанахъисса аьралитуран гуманитар кумаг биян бувну. Ванащал аьралитуран цала чулухасса кумаг биян бувну увкIунни Къизляр шагьрулул Мажлисрал депутат, ишбажаранчи, ЦIийшиял шяравасса МахIаммад Халидов.

Ва ххуллухьсса вайннал цала чулухасса кумаг цIа куну бия Луганскаллал Халкьуннал Республикалий, Курский ва Белгородский областирдай аьралий буржру бартбигьлагьисса «Каспий» батальондалувусса «Пламя» тIисса подразделениялул аьралитуран.
Дагъусттаннал батальондалул аьралитурал ххарину хьунабавкьунни ссайгъатру лавсун бувкIсса хъамал. Аьбдулкарим аьралитурачIан лавсун лавгун ур хасъсса аьралий операциялул шартIирдай цалчин аьркин дагьайсса кьай-кьуй, медикаментру, спецоборудование. Къучагътурал дакIру ххари даву мурадрай, аьралитуран дуллунни ванал сувенирду ва дуклаки оьрчIал чивчусса чагъарду.
«Каспий» батальондалул командир, полковник Табир Маликовлул аьралитуран ка-кумаг баврихлусса барчаллагьрал чагъар буллунни Аьбдулкаримлухьхьун.
Командирнал кIицI лавгунни Дагъусттаннал халкь мудангу чIарав бацIлай бушиву ва укун дугърисса, уздансса инсантурал кумаграйну жула аьралитал ссахчIав мюхтажну бакъашиву.
Махъсса ппурттуву ялу-ялун чIяву хъанай бур хасъсса аьралий операциялий гьуртту хъанахъисса аьралитуран кумаг бан ччисса инсантал.
КIицI лаганну, Аьбдулкарим Айгуновлул ва ванал гьалмахчу МахIаммад Халидовлул хасъсса аьралий операция наниссаксса хIаллай цимилагу тIайла бувкшиву аьралитурансса кумаг.
Имара Саидова