Лакрал райондалул администрациялий хьунни хасъсса аьралий операциялий ватандалул мурадру буручлачисса аьралийтурал ниттихъул ва хъами барча буллалисса батIаву.
Райондалул бакIчи Зураб Куччаевлул кIицI лавгунни аьралийтурал кулпатирттал буруккинтту паччахIлугърал хьхьичIунсса ххуттай бушиву.
«Ватандалул мурадру буруччаврил ххуллий талатиминнал буруккинтту гьарца кьинисса къулагъасралу бикIан аьркинссар. Жу хIарачат буллай буссару бюхъайссаксса зул чIарав бацIан», – увкунни ванал.
«Зул чумартшиву ва дакI кьянкьашиву эбратранссар. Зул аьзизми талай буссар жула ялун бучIантIимунил ххуллий, жулгу аьмсса буржри зу буруччаву. Барчаллагь зун! Чан къабаннав зул ужагъирттай барачат!» – увкунни Халкьуннал Мажлисрал депутат Марат Илиясовлул.
«Гьаркьини Ватандалул мурадру буручлачиминнащал зий ухьувкун, ттун кIулли цуксса мюхтажну буссарив тай зул кумаграх. Ччясса мутталий сагъ-саламатну цала кулпатирттал ялун зана хьуну ккакканнав зул аьзизми! Жу жула вирттаврах ялугьлай буссару», – увкунни райондалул аьралий комиссар Аьли ГъазимахIаммадовлул.
«Зул арсру ва ласру Буттал кIанттул хьхьичIсса бурж лахълай буссар. Зу тIурча, биттур буллай буссару ниттихъал ва кулпатирттал буржру. Зул дакIру рахIат дурксса кьини дуркIун ккакканнав!» – увкунни прокурорнал хъиривчу Хизри НурбахIандовлул.
«Жуща къахьунссар лякъин зул аьрарххусса дакIру тирх учин дансса, симанну пиш учин дансса махъру. Амма жу буржлувссару зул чIарав бацIан. Зул буруккинтту – жул буруккинттур! Жу мудангу зул чIарав буссару», – увкунни хасъсса аьралий операциялий талатиминнал суаллалсса буллалисса райондалул бакIчинал кумагчи Ярагъи Дандамаевлул.
Хъаннийх дарчIунни тIутIив. Муния махъ Зураб Куччаевлул жап увкунни аьралийтурал ниттихъащал.
Зулайхат Тахакьаева
