ЦIуссалакрал райондалий мубараксса Рамазан зуруй дайдирхьунни хасъсса аьралий операциялул гьурттучитуран кумагрансса акция.

Ванил сакиншинначиталну ва сиптачиталну бувккунни ДР-лул Халкьуннал Мажлисрал Законодательствалул, закондалул, паччахIлугърал строительствалул, кIанттул цила каялувшиннарал ва ­регламентрал комитетрал председатель Артур Исрапилов, ЦIуссалакрал миллат бизан баврил масъалар­ттаха ва Аухуллал район цIу дуккан даврилсса буллали­сса управлениялул хъунама МахIаммад-ХIажи Айдиев, ЦIуссалакрал райондалул администрациялул бакIчи МаматIи ХIамзатов.
Акциялул сиптачитурал иникьали, качар, ппиринж ва цаймигу дуки-хIачIиялийнусса кумаг бунни хасъсса аьралий операциялий гьуртту хъанахъисса ва жанну дуллусса аьралийтурал кулпатирттан.
Вайннал аьралийтурал кулпатирттахь цIухху-бусу бунни цукунсса захIматшивурттащал хьунабакьлай буссарив ва ­хъуниминнал чулуха ци кумаг аьркинну буссарив.
Цинявппагу кулпатир­ттал кIицI бувсса масъалар­тту ­дузрайн буккан баврил ялув бацIаву дан бакIрайн лавсунни акциялул сиптачитурал.
Имара Саидова