ХIакьину, билаятрай захIматсса тагьар хIасул хьусса ппурттуву, чансса бакъар жула аьралийтуран кумаг буллалисса патриотътал.
Украиннал аьрщарай хасъсса аьралий операция байбивхьуния шинмай аьралийтуран кумаг буллай, шайсса куццуй миннал чIарав бацIлай бур ДР-лул культуралул лайкь хьусса зузала, Т. Мурадовлул цIанийсса Дагъусттаннал паччахIлугърал филармониялул директорнал хъиривмур Кьурбаннул душ София Разуева.
Ванил каялувшиндаралу цимилгу дунни аьралийтурал чIарав бацIаву мурадрайсса ихIсандалул концертру. Мероприятиярттай хьусса арцух ласлай бур аьралийтурансса медикаментру, дуки-хIачIия ва чIярусса цаймигу кьай-кьуй. АьралийтурачIан гуманитар кумаг биян бувангу филармониялул артистътал цивппа занай бур. Тикку вайннал ккаккан дуллай бур аьралийтал таза буккан баву мурадрайсса концертру.
Хасъсса аьралий операциялул гьурттучитуран кумаг баврихлу, Софиян дуллунни Ростовуллал областьрайсса 41497-мур аьралий частьрал штабрал хъунама, подполковник Валентин Девкиннул чулухасса ХIурматрал грамота.
Ванияр хьхьичIгу, хасъсса аьралий операциялул гьурттучитуран кумаг баврихлу, София лайкь хьуну бур «Великая община» тIисса жяматийсса суккушиннарал чулухасса Барчаллагьрал чагъарданун ва «За содействие СВО» тIисса медальданун.
Яла хъунмур награда тIурча Софиян аьралийтурал чулухасса барчаллагьрал махъру бур, ванияр тихунмайгу ва ка-кумаг буллан хIадурну бур.
Имара Саидова
