Украиннал аьрщарай нанисса хасъсса аьралий операциялий гьуртту хъанахъисса ЦIуссачIурттащиял шяравасса Маликлул арс Кьурбан МахIаммадов лайкь хьунни ПаччахIлугърал ларайсса наградалун. Аьралий бигарду къучагъну бартбигьаврихлу ванан дулунни Жуковлул медаль.

Аьралий иширттаву гьуртту хъанахъиссаксса хIаллай ­Кьурбаннул ккаккан бунни цува Ватандалул хIакьсса патриот ушиву.
Сивсусса, кьянкьа-кьурчIисса, дакI-аьмал хъинсса, кумаграх мюхтажнал чIарав ацIайсса унутIий ва бусравну ур гьалмахтуран. Низам дусса, жаваблувсса аьралийчу цимилагу лайкь хьуну ур командованиялул чулухасса Барчаллагьран.
«ЧиваркIуннал буржри Ватан дуруччингу, ванил цIаний жан дулунгу» тIисса дур ванал девиз. Буниялагу, хIакьинусса кьини Украиннал аьрщарай хъанахъисса иширттал инсантурал дакIурдивун вас-ццах бутлай бур. Оьрмулун хъуннасса нигьачIаву дусса кIанттурдай лайкьсса даражалий аьралий бигарду барт бигьлай бур Кьурбан ва ванал аьралий гьалмахтал. Укунсса жагьилтал жула дянив буссаксса билаятрал бучIантIимур чаннасса хьуншиврийн щак бакъар.
ЧIа учинну Кьурбаннун ва жула цинявппагу аьралийтуран ххувшавугу ларсун, цIуллуну-сагъну махъунмай зана шаву.

Имара Саидова