МахIачкъалалив, А.Юсуповлул цIанийсса (нукIувасса Хуршилова) кIичIираву, волонтертурал штаб бусса хIаятраву хьунни «Надежный тыл – крепкий фронт» цIанилусса военно-патриотический форум. Вай волонтертурая къабавсса Дагъусттаннай нажагьссавагу бакъахьунссар.

Хасъсса аьралий операция байбивхьуния шинмай вайннал аьралуннан бувсса кумаграл хIат-хIисав дакъассар. Хьхьу-кьини къаувкуну зий, нахIу- нацIурду шахьлай, къертту щашлай, медициналул аптечкарду батIлай, хIадурмур аьрайн диян дуллай, отпускалий бувкIсса ­аьралийтал хьунабакьлай, аьрайн наними тIайла буклай, вайннал буллалисса захIматран багьа бищун къахьунссар. Арцуйну буллалисса кумаграя на гъалгъа тIийвагу бакъара. КIицI къабувну битан къахьунссар, штабравусса чIявумигу жула лак бушиву.
Ва кьинисса форумрал мурадгу бия укунсса, цала хушрай волонтершиву дуллалисса суккушиннардал чIарав бацIаву, гуманитар миссия щаллу буллалисса волонтертал, жяматийсса организацияртту лахъа-хъун дурну, миннал дуллалимунин лавайсса кьимат бищаву, хасъсса аьралий операциялий ватандалул мурадру буручлачиминнахь ва миннан кумаг буллалиминнахь барчаллагь учаву.
– ХIакьину волонтертал кIилчинмур фронтран ккаллину бур. Жула ххувшаву гъан дан захIмат бихьлахьими жяматран кIулну бикIан аьркинссар, – тIий бур мероприятиялул сакиншинначитал.
–Талатавурттаву аьрал ххув шайссар, дяъвилий халкь ххув шайссар,– учай. ХIакьинусса кьини гьарицагу волонтер жула аьралийтурал чIаравсса хъунмасса гужри. Ва кьинисса ­форумгу хас дурну дия хьхьичI ххуттай бавцIусса аьралийтурал ва шаппа миннах ялугьлагьиминнал цашиврул савлугъран.
Мероприятиялий гьуртту хьунни шагьрулул администрациялул ва жяматийсса организациярттал вакилтал, хасъсса ­аьралий операциялий жанну дуллуминнал, ятIатIар бакъа бакъа хьуминнал ва цIанасса чIумал тийх талатиминнал нину-ппу, уссурссу, кулпатру, гъан-маччами, аьралийтуран ­вихшалдарайсса къинттану ва къалхъанну хьуми.
Майданнул лагма лархъун дия волонтертурал щаршсса къертту.
Мажлис тIивтIунни ва гихунмай бачин бувну бия правозащитница, «Солидарность и Свобода» тIисса Жяматийсса советрал хъунаманал ­хъиривмур, гуманитар кумагращал 58-лла хасъсса аьралий операциялийн лавгсса Ума Аскерханова ва ­чялишсса волонтер, аьралийтурал дус, Казбековуллал райондалия бувкIсса урчIра шинавусса Аьйшат ХIасанова. Мажлисрал лагрулий Ума Аскерханован дуллунни СВО-лул виричунал орден-цIуку.
Форумрай ихтилатру бунни «Солидарность и Свобода» Жяматийсса советрал председатель, 45-ла гуманитар кумаг биян бан хасъсса ­аьралий операциялийн лавгсса хIакьсса патриот МахIаммад КьурамахIаммадовлул, 1999-ку шиналсса цачIусса ополчениялул ветерантурал чIарав бацIлацIисса Дагъусттаннал ­жяматийсса организациялул президент Абубакар ­Кьурбанисмяиловлул, МахIачкъала шагьрулул бакIчинал маслихIатчи Сабир ХIамзатовлул. Вайннал дуллунни яла чялишми ­волонтертуран ва организациярттан наградарттугу: орден-медальлу, ­Барчаллагьрал чагъарду, ХIурматрал грамотартту.
Лакраясса пахрулул дуцIлай дия дакI кIа мероприятие наниссаксса хIаллай. Ва штабраву цалчинсса гьантрая шихунмай зий, аьралийтуран хъунисса кумагру буллалисса чIявуми лак бия, ва кьини чIяруми наградарттугу миннан дия. ­Гьарицама кIицI къаувну итан къахьунссар. Гуманитар кумагращал урчIийла аьрайн лавгсса ва мудан цила чулухасса кумаг байсса ТIаннул ЦIувкIратусса ­Садаят МахIаммадова. Форумрай ванил увкунни хасъсса ­аьралий операциялий чувшиврий жан дуллусса цила шяравучу, подполковник Дибир Дибировлун хас бувсса ва цаймигу балайрду. Щала мажлисрай музыкалул бутIулсса буллай, цувагу балай тIий, мажлис чIюлу бунни Къюллул ЦIувкIратусса Шарапи Ажубовлул. КIицI лаган, ваналли чирчусса «хуршиловцынан» хас дурсса гимнрал ­макьан. Мажлисрай ванал му гимнгу щаллу дунни. Садаятлун ва Шарапинан ва кьини буллунни Барчаллагьрал чагъарду.
Арцуйну, дуки-хIачIиялийну мудан ххуйсса кумаг буллалиссар аьрайн ЧIарттал шяраваллил жяматрал. Жяматрал вакилтурансса: хIакин-косметолог Аьйшат Кунаевансса, Норильск шагьрулий ялапар хъанахъисса ва зузисса МахIаммад Сулаймановлунсса ва циннасса наградартту ( Барчаллагьрал чагъарду) ларсунни штабрай къуш бивщунмасса Сарбижамал Буттаевал. Наградалун лайкь хьунни КIувратусса Гьаруновхъал кулпат. Исмяил ва Мисидугу цалчинсса гьантрая байбивхьуну зий буссар Хуршиловалийсса штабраву. Исмяиллулли дурсса кIикку къертту щашлансса конструкциярттугу. Форумрал лагрулий ­Исмяиллун дуллунни «За содействие СВО» медаль, ­Мисидун – Барча­ллагьрал ­чагъа­р. Мисидул уссу ­Багьауттиннулгу вайннайхчин мудан арцуйнусса ва укунмасса кумаг ­байссар аьралийтуран. ХIурматрал грамота дуллунни ва кьини ­аьралийтуран рахIатшиву дусса биялсса кIараллу ­бурувххусса ва мудан штабраву зузисса ЦIуссаккулатусса ­Ххадижат АхIмадован. Барчаллагьрал чагъарду буллунни ЦIуссаккулатусса Эмара Щамххалован, аьрайн кумаг тIайла буклай цинявннан ххуйну кIулсса ЧIятусса Бадуржагьаннун, Бархъаратусса Оьмар Аьлибецовлун, хасъсса аьралий операциялий къуллугъ буллалисса ­аьралийчунал ниттин, Ккулатусса Наташа СултанахIмадован. Мукунма Барчаллагьрал чагъардан лайкь хьунни хасъсса аьралий операциялун ххуйсса кумагру бувсса «Ябувара жулва миллат», «Ниттил маз», «МарцIсса лакрал жямат» тIисса лакрал ккуранну, ТIаннул ЦIувкIуллал шяравасса патриотътурал ккуран.
Цинярдагу ­наградартту ­лакрал дурххунни тIий, ­хъярчирдай бия гьурттучитал.
Цинявннаяр чIявусса ва хъунисса кумагру буллалимигу лак бур.
КIицI лаган ччива ва кьини наградалун лайкь хьусса, Хуршиловалийсса штабрал хъунмур, МахIачкъала шагьрулул бакIчинал хушрайсса кумагчи, чялишсса волонтер, ярусса­ннал миллатрал лайкьсса вакил ­Наниш Мажидовагу.
ЦIуллушиву дулуннав аьралийтурангу, тайннал чIарав бацIлацIиминнангу.
Наградартту дуллуну махъ цинявннал ххира-ххуйгу увну, аьралийтурансса ссайгъатругу бивхьуну тIайла увккунни ца-кIива гьантлийсса увкIун ивкIсса Нажмуттин. Ва тIайла уклай, ссийл Юлдузлул увкунни бюххансса балайрду.
Мероприятие къуртал хьуну махъ цинявппа бавтIунни ­ссупралухун, ххал бунни узбакI жагьилнал бувсса нахIува-нахIусса пулав.

Андриана Аьбдуллаева