Ватан дуруччул шинал лагрулий Буттал кIанттул цIанийсса Хъун дяъвилий Ххувшаву ларсун 80 шинал хьунийн Гъумучиял школалий тIивтIунни «Аьпалул чIира».

Ва акциялул сиптачи хьуну бур школалул директор Соня Макаева.
Ванил бусаврийн бувну, «Аьпалул чIира» школалий тIитIинсса пикри хIасул хьуну бур МахIаммадхIажи Къаплановлул «Кази-Кумух и его тухумы» тIисса лу бувккун махъ.
«Гъумучири душ хIисаврай ттула буржру чIалай бия ватан душманная мурахас дуллай, оь экьибувтIсса шяравучутурал аьпа абад баврил ххуллийсса давуртту дан: школалул багъраву мурхьру бугьаву хьуннав, стендру хIасул даву хьуннав, дяъвилия зана къавхьуминнал оьр­мурдая бусласисса тIиртIусса дарсру хьуннав. Стендрайн лархъун дуссар Хъун дяъвилий ватандалухлу жанну дуллусса Гъумучатусса 93 тухумравасса 95 чиваркIуннал суратру», – увку­нни Соня Макаевал.
Дуклаки оьрчIругу пахрулий пасихIну ва бюхханну буслай бия Хъун дяъвилий талай бивкIсса цала ватанлувтурал чувшиврия ва къучагъшиврия.
Проектрал каялувчи, ни­ттил мазрал дарсирдал учитель Роза Бавасулаймановал барча­ллагь увкунни Гъумучиял агьалинахь, Хъун дяъвилул гьурттучитурал суратру датIин бувсса кумаграхлу.
«Агьалинал кумаг бакъа жуща вайксса суратру дартIун ва агьамсса проект дузрайн ду­ккан дан къашайссия», – увку­нни ванил.

Зулайхат Тахакьаева