Мартрал 5-нний МахIачкъалалив Поэзиялул театрдануву хьунни жагьилсса художница, Аьрасатнал Художниктурал союзрал член, Хъунайннал шяравасса Гульнара Аьлиевал ­печатный графикалул «Барзах» цIанилусса выставка.

Най буна кIицI лаган, ва журалул, яни марцIсса печатный графикалул (цамур графика хIала дакъа) давурттал выставкарду нажагь дакъа къашайссар жучIара.
Выставка тIитIлатIисса ­шадлугърайсса батIаврий гьуртту хьуна Дагъусттаннал Художниктурал союзрал председатель Кьурбанаьли МахIаммадов, Выставкарду дувай залданул директор Амирхан МахIаммадов, Дагъусттан Республикалул халкьуннал художник Юсуп ХанмахIаммадов, Дагъусттан Республикалул лайкь хьусса художниктал Ибрагьимхалил Супиянов, Наталья Савельева, искусствовед, арт-критик Влада Бесараб, Дагъусттаннал Художествалул училищалул педагог ПатIимат АхIмаева ва цаймигу. Шадлугъ дайдихьлахьисса ихтилат бувна Поэзиялул театрданул директор Елена Гьаруновал.

Выставкалий дур авторнал линогравюралул техникалий щаллу дурсса 20 графикалул сурат. Вайннуя буруглай бур бакIру кIяла хьусса къужри – ккурчIай щябивкIсса хъунисри, яттищалсса ва ккаччащалсса хIухчалт… Афишалийгу, экспозициялул дянивгу дур художницал «Барзах» выставкалул давурттавасса агьаммур – «Ппу» тIисса сурат. Выставка хас дурну дур жула дянива лавгминнал ­аьпалун. «Барзах» – инсаннал бивкIулул ва утта уккаврил ­дянивсса тагьар.
Цилла суратирттацIунсса бувчIин бавуртту, иллюстрацияртту хIисаврай Гульнарал ишла бувну бур художник Ибрагьимхалил Супияновлул шеърирду.
«Барзах» выставкалийн хIадур хъанай Гульнарал ­хъунмасса хIал хьуну бия, афишалул дизайндалулсса, пригласительный билетирттацIун дархIусса цимурцаннулсса цилва буллай. ВыставкалуцIун бавхIусса ­масъаларттаву маслихIатирттал хъирив художник ва педагог Юсуп ХанмахIаммадовлуйн буклай. ХIадуршиннараву кумаг бувну бия мукунма скульптор Шамил АхIмадовлулгу.

Ва художницал циллалусса шамилчинсса выставка хъанай дур. Цалчинна-цалчинмур («Дастархан» цIанилу) хьуссар Санкт-Петербурглив. КIилчинмур ­(«Мархарай») – МахIачкъалалив. Цайминнащал архIал хьусса выставкардурив ванил цимирагу дур.

2009-ку шинал Гульнарал Дагъусттан ккаккан бувссар Москавлив «Русский силуэт» конкурсрай, ларсъссар Гран-при. Жулва ­билаятрал культуралул столицалун ккаллисса Санкт-Петербурглив, циллалусса цалчинсса выставка дакъассагу, хьуссар ванил цайминнащалссагу, «Этнопалитра», «Этно-пикник», «Дусшиврул ­ламурду» тIисса. Жулла республикалий хьуми выставкардая къатIий, ва гьурттусса выставка-триеннале хьуссар Казанъ шагьрулул «Хасинэ» тIисса цIанилусса национальный галереялувугу.
Гульнара бувну бур УзбакIист­таннай, школалийссагу, ванияр гихуннайссагу дуккаву дурну дур Дагъусттаннай. Бувккуну бур Дагъусттаннал М.А. Жамаллул цIанийсса Художествалул училище, Дагъусттаннал паччахIлугърал педагогический университет.
«Барзах» выставка дикIан­тIиссар ва зурул ахирданийннин.

Бадрижамал Аьлиева