Бабаюртуллал райондалийсса Арусси шяраву (шикку ялапар хъанай буссар Карашрал ва Гьуйннал жямат) тIиртIунни хасъсса аьралий операциялий ватандалул мурадру буруччаврил ххуллий чувшиврий жан дуллусса Гьуйннал шяраватусса Шихамир Гьаруновлул аьпалул ула. Ва кьини аьраличунан цаннагу хьунтIиссия 60 шин. 

Билаятрал мюхчаншиврул цIаний жан хIайп къакусса виричунал аьпалул хIурматрансса ва ялун нанисса никиран эбратрал лишанну хъанахъисса ула ларчIун дур аьраличу дуклай ивкIсса школалул чIирай.
Шихамир, 2024 шинал Аьра­сатнал обороналул министерствалущал контракт чирчуну, кьамул увну ур цалчинмур мотострелковый бригадалул стрелковый батальондалул наводчикну. Аьралий буржру биттур буллан тIайла увккун ур Курскаллал дазуйн. 2025 шинал Шептуховка тIисса шяраву чувшиврий жан дуллуну дур. Шихамир дакIнин утан бувкIун бия ванал шяравучутал, школалул учительтал ва дуклаки оьрчIру.
Мероприятиялул бусравсса хъамал бия Лакрал райондалул администрациялул бакIчинал хъиривчу Малик ХIусманов, аьра­лий комиссариатрал отделданул каялувчи Ажуб Юсупов, «Память Гор» организациялул Лакрал райондалийсса отделениялул каялувчи Ярагъи Дандамаев.
Малик ХIусмановлул кIицI лавгунни Ватандалул мурадру буруччаврил ххуллий жанну дуллуминнал аьпа буруччаву паччахIлугърал агьамсса ххуттай ккаклай бушиву. Виричунал щащар Фариде Гьаруновайн тапшур дунни хасъсса аьралий операциялул гьурттучинал медаль.
Ихтилатру бунни Ажуб Юсуповлул ва Ярагъи Дандамаевлул.Дуклаки оьрчIал дурккунни Ватан дуруччултран хас дурсса назмурду.
Шихамир Гьаруновлул гъан-маччаминнал дакIнийхтуну барчаллагь увкунни райондалул администрациялухь аьпа абад бансса сипталухлу ва аьпа абад бан бувкIцириннахь.

Зулайхат Тахакьаева