ЦIуссалакрал райондалул ЦIуссаккуллал шяраватусса Ххадижат АхIмадовал цинявппа хIайран бувну кьабивтунни «Интнил хьхьунил» хьунийн цила арсурваврал оьрчIа-душвавран караматсса бартрал коллекция баврийну.
Ванил дурну дур лакрал шяраваллал сипат ва хасшиву ккаккан дуллалисса 20-нниха лирчусса бартри.
Вана винна усттаршиву, ка магьиршиву! Гьарца барта дур личIи-личIисса щархъал лаххиялувусса хъаннил ва арамтурал куццирал журалийсса. «Бигьану бакъая бартри дуван. Багьлай бия лаххиялул ва чIюлушиннардал куц бусса журалий ккаккан бан», – мукIру хъанай бур Ххадижат.
Укун ляличIисса коллекция бансса пикри дакIниву хIасул хьуну бур ванил буттал кIанттухсса ва магьирлугърахсса ччаврил, буттахъал аьдатирттая хъирив нанисса никирахь бусансса гьавасрал.
Ххадижат АхIмадова зий бур МахIачкъала шагьрулул 26-мур школалий химиялул дарсру дихьлай. Хъуннасса гьурттушинна дуллай бур хасъсса аьралий операциялий талатисса жула оьрчIан гуманитар кумаг буллалисса ккураннал давривугу.
