Майрал ахирданийсса ххуллун ва алхIат кьинирдай, ДР-лул лайкь хьусса строитель, Дагъусттаннал альпинист, «7 Вершин» тIисса Москавуллал альпинистътурал клубрал член Зиябуттин ХIажимирзаевлул зунттавунмайсса аьрххи ляличIинува тамашасса хьунни.
130 километралул манзилданийх, 30 ссятрал мутталий, ва цана цувалу, ахьтта увкIунни МахIачкъалалия ГьунчIукьатIрал шяравун. Ххуллийн уккан хьхьичI хIадур бувну бивкIсса «Махачкала – Унчукатль соло-забег 130 км» тIисса чичру ва ГьунчIукьатIрал герб дусса футболкагу лавххун, дайдирхьуну дур Зиябуттиннул марафон.
Хьхьунил ссят 3-ннил дачIинний МахIачкъалалия Кьилвалул чулухунмайсса пострая увккун, хьхьунил ссят 11-нний ивну ур ва Лаващав. АцIаву дакъа ачинсса ниятрай ивкIсса Зиябуттиннун чансса унугу игьалаган Лаващав ацIан багьну бур. Шанугу къалавхъун, хьхьуниву ххуллийн увккун ачин захIмат хъанай бивкIун бур. Мунияту, Лаващав гостиницагу ххал бувну, ца кIира-шанна ссятрайсса шанугу лавхъун, чан-кьансса кIюрххилссагу дуркуну, ссят арулуннил дачIинний ххуллийн увккуну ур.
Лаващату Ххажалмащилийн нанисса ххуллий ччан цIун бувну, ачин къахъанай най ивкIун ур. Ва инжитну нанисса чIалай, иян анну тIий, чIарах нанисса машинартту бацIан буллай бивкIун бур. Зиябуттиннул цала ххуллу бяличIан къабувну, цIуцIисса ччаннащал хIурхIа най ивкIун ур. Ххажалмащилул чулухунмайсса ххуллу бивтун махъ ччангу рахIат хьуну бур, амма ялагу цIийнма бивкIун бур. ЦIахъарату ливчуну, ВицIхъав бияннинсса ххуллийх дяркъугу дурккун, гужсса гъаралгу ларчIун, чят хьуну ур. Ганиннин хьхьичIмур кьини тIурча, Лаващав ияннинсса ххулийх гужсса кIиришиву дуну, ута-ласу хьуну ивкIун ур. ГьунчIукьатIув ияннингу кIира-шанна ссятрай дацIаву дакъа ларчIусса гъаралух най ивкIун ур. Гьанттайн ссят ххюнний Зиябуттин ивну ур ГьунчIукьатIув.
Ванал цува ахьтта нанишивугу щихьчIав къабувсун бивкIун бур. ХIатта душнин, арсурваврангума къакIулну бивкIун бур. Вайннан ххуллийн увккун махъ кIул хьуну, махIаттал хьуну бивкIун бур. Зиябуттин ахьтта буттал шяравун нанишиву кIулну бивкIун бур ванал экстремал аьрххирдайн аьдат хьусса кулпат Валидан. Вагу, муданма кунма, дуаьрдай ва ссавурданий ялугьлай бивкIун бур финишрайн иянцIакул.
Чарил-Ламуйн ивсса чIумал, Зиябуттиннул телефондалий дирхьусса аьрххилул суратру ккарккуну дур дустуран, мачча-гъанминнан. Ванал маччачу Шамил Штанчаев уцин учIанна тIий, оьвтIий ивкIун ур. Мукунма, Зиябуттин нанишиву кIул шайхту, ГьунчIукьатIрал шяраву чяйлущал, шампанскийлущал ва тIутIащал ва хьунаакьуну ур школалул директор Малик Къушиевлул, шяраваллил администратор МухIад Штанчаевлул ва ванал кулпатрал.
Зиябуттин ХIажимирзаевлул аьрххи-ххуллурдайсса яхIирая, ссавурдания кIулминнан махIаттал хьунсса цичIав бакъар. Африканавусса яла лахъмур Килиманджаро-Зунттуйн, Ккавкказнаву, Аьрасатнаву ва Европанаву яла бюхттулмур Эльбрус-Зунттуйн, Баргълагавал Европанавусса яла бюхттулмур Монблан-Зунттуйн, Ухссавнил Американавусса яла бюхттулмур Аконкагуа-Зунттуйн ва Орисаба вулкандалийн, Пик-Лениналийн, Шалбуздагъ-Зунттуйн ва ПпабакIу-Зунттуйн гьаз хьусса инсаннал цал уттигу ккаккан дунни цала кьянкьашиву, сисаву ва захIматшивуртту духIансса яхI-къирият ларайсса душиву.
КIицI лаган, бюхттул зунттайн гьаз шаву бакъассагу, Зиябуттиннул цала бюхъу-гьунар цимилагу ккаккан бунни «Тинькофф Dagestan Wild TraiI-данул» дуллалисса, трейлраннинграхун багьсса профессионалтал гьуртту хъанахъисса, зунттавух, ратIавух, вацIравух ва авлахъирттайх лечаврил марафондалийгу.
Имара Саидова
