Майрал 14-нний ДР-лул бакIчи Сергей Меликовлул каялувшиврий ххал диргьунни республикалун агьамшиву дусса темарду:

Буйнакскаллал райондалул Чиркей шяраваллил ялапарлувтал щинал дузал баврил тагьар, МахIачкъалаллал ялапарлувтал электроэнергиялул дузал баврил даража лахъ баву, щинал дузал баврил, чапалсса щин дукьан даврил ва тIювардавун гъилишиву дулаврил давуртту, мукунна Бюхттулсса Ххувшаву ларсун 79 шин шаврицIунсса мероприятияртту бартдигьаврил хIасиллу даву.
Дагъусттаннал бакIчинал бувсуна Аьрасатнал президент Владимир Путиннул къулбас дурну душиву «О национальных целях развития Российской Федерации на период до 2030 года и на перспективу до 2036 года» тIисса ХIукмулий. Му стратегиялул документрай ккаккан бувну бур региондалун хъуннасса агьамшиву дусса ххуллурду:
кулпатирттан кумаг баву, агьали ябаву ва миннал цIуллушиву цIакь даву, гьарца инссаннал пагьму-гьунар ва потенциал лябуккан баву, инсантал жаваблувну ва патриотшиврий тарбия баву, инсаннал оьрмулун мюхчансса ва къулайшивуртту дусса шартIру дузал даву, экологиялул тагьар ххуй даву, цIакьсса ва хьхьичIуннай хъит кусса экономика лядуккан даву, технологиялул чулухасса лидерствалийн кIункIу шаву, паччахIлугърал ва муниципал управлениялий, экономикалуву ва социал аралуву цифралул трансформация ишла даву.
«Вай циняв Дагъусттаннал хьхьичI бивхьусса задачартту приоритетссаннун ва цалчин ярглий дузал буванссаннун ккаллиссар», – куна региондалул каялувчинал. Ванал тIимунийну, вайннувасса чIявуми масъаларттаха региондалий зий буссар.

ХIадур бувссар ХI. Аьдиловлул