Мартрал 3-нний Дагъусттаннал бакIчи Сергей Меликовлул дунни гьарца зурух республикалул властьрал органнал каялувчитуращал дайсса батIаву.
Ххал бивгьунни инсантурал лабизавурттащалсса давурттал, дуккаврил учреждениярттал зузалтрал аттестациялул, муниципал бюджетирттал арцу дачIаврил, республикалий ТКО зана-кьала даврил ва цаймигу масъалартту.
Сергей Меликовлул бакIрай бувсунни цIусса къуллугъчитал битаврил хIакъираву.
Нюсрет Оьмаров ивтунни Дагъусттан Республикалул ПаччахIлугърал секретарьнал къуллугърай.
Марат Темирханов ивтунни ПаччахIлугърал Хъус машан ласаврил (по закупкам) комитетрал председательну. Уттинин ва зий ивкIссар прокуратуралул органнаву.
Арсланбаг Аьлибагов ивтунни Дагъусттаннал транспортрал ва ххуллул хозяйствалул министрну.
Ххал бивгьунни инсантурал лабизавурттах властьрал органнал къулагъас даврил масъала.
Январьданул 13-нния шинмай социал сетирдаву сияхIрайн ларсун дур мукунсса 17,5 азарда лабизаву. ДР-лул БакIчинал ва ХIукуматрал Администрациялул каялувчи МахIач Оьмаровлул бусаврийну, чIяруми лабизавуртту дур ЖКХ-лул масъаларттал хIакъиравусса, мунияту ми тIайла дурккун дур бартдигьин муниципал сакиншиннардайн ва ресурсосбережениялул идарарттайн.
ДР-лул АГиП-лул каялувчинал хъиривчу, ДР-лул БакIчинал Информациялул политикалул ва пресс-службалул хъунама Рашид Акавовлул ккаккан дунни минитерстварттал, депутатътурал ва муниципал сакиншиннардал каялувчитурал медиарейтинг. Халкьуннал Мажлисрал депутатътурал дянивсса медиарейтинграл лидерталну бур: Елена Павлюченко, Марат Аьлияров, Камил Давдиев, Юрий Левицкий.
Районнал ва шагьрурдал бакIчитурал дянивсса лидертал: МахIачкъалаллал мэр Жамбулат Салавов, Табасараннал райондалул бакIчи МахIаммад Кьурбанов, Хасавюртуллал бакIчи Куругъли Куругълиев, Дарбантуллал бакIчи Ханлар Пашабеков, Буйнакскаллал райондалул бакIчи Табир Маликов, Дагестанские Огни шагьрулул бакIчи Замир ХIажимурадов.
Исполнитель властьрал органнал каялувчитурал дянивсса медиарейтинг: миллатирттал политикалул министр Тамирлан АбутIалимов, энегетикалул министр Марат Шихаьлиев, дуккаврил ва элмулул министр ЯхIия Бучаев, культуралул министр Зарема Буттаева. ЯхIия Бучаевлул бувсунни школардал штатирттал политикалия ва директортурал аттестациярттал хIакъираву. ДакIнин бутанну, хьхьичIми шиннардий бивкIун бур Дуккаврил министерствалущал цачIу аттестация къадайсса кIанттурду. Ххал бигьавурттайну аьям бувну бур квалификация цIакь къадурну дуна школардал директорталну зий бивкIсса ишру.
Аттестация къадурну зий ивкIун ур 60 директор, 11 муниципалитетраву, 17 директорнал хIакъираву Дуккаврил министерствалул вакилнал къакьамулсса (отрицательное) заключение чирчуну дуна, тай директорталну зий бивкIун бур, аттестация дуршиврун ккалли бувну. Мунийн бувну, дуккаврил министрнал муниципалитетирттан маслихIат бувну бур:
Анаварсса мутталий школардал директортуращал 5 шинайнсса захIматрал договордайн бучIан, цIакь дуван шанна шинайнсса аттестациялул план, давривун кIункIу буллан профконкурсирттай ххув хьуми.
Дурсса давурттал хIасиллайну 60 директорнавату 51 лахъан увну ур 2026-2027 шиннардийнсса аттестациялул графикирттайн, 9 каялувчи укьан увну ур къуллугъирттая, циняв муниципалитетирттал цIакь дурну дур шанна шинайнсса аттестациярттал планну.
«Дуккаврил учрежденияртту цила низамрай зуншиврул цинярда дахханашивуртту дуван аьркинссар июльданул 1-ннийнин. Мукун бакъахьурча, сентябрьданул 1-нния махъ му бутIул полномочияртту (ихтиярду), миннуцIун директортал битаврилссагу, дучIантIиссар республикалул биялалийн. Жу жува битланну школардай каялувшиву дан бюхъайсса директортал», – увкунни Сергей Меликовлул.
Муниципал бюджетирттал арцу дачIаврил хIакъираву бувсунни республикалул цалчинма вице-премьер Руслан Аьлиевлул.
Республикалул энергетикалул ва тарифирттал министр Марат Шихаьлиевлул ва Дагъусттаннал строительствалул, архитектуралул ва ЖКХ-лул министр Бахтияр Уллаевлул бувсунни муштаритурал коммунал хIаллихшиннахлусса багьри булаврил бутIуву хьусса буржирдал хIакъираву.
Муния махъ региондалул бакIчинал бувккунни АьФ-лул Президентнал СКФО-райсса вакил Юрий Чайкал чивчусса чагъар, муний бувсун бур республикалул властьрал органну мюнпатну зий бушиврия.
Дагъусттаннай махъсса шанна шинал мутталий национал проектру бартдигьин бюджетрал итадаркьусса арцу цила ххуллий харж даву(кассовое исполнение) лахъ хъанай дур. Ларгсса шинал му ккаккия хьуну дур 99,1 %, СКФО-рал дянивсса ккаккиялияр лахъссар.
Региондалул проектру бартдигьаврил лагрулий бувну бур ва бакьин бвну бур 314 объект.
Ларгсса шинал Дагъусттан бувххун бур бюджетрал арцу щаллуну цила ххуллий харж дурсса АьФ-лул 15 региондалувун.
ХIадур бувссар ХI.Аьдиловлул
