Санкт-Петербурглив Аьрасатнал Следственный комитетрал академиялуву хьунни «КIяла кьурукьирттал кьинирдал» аьпалул акциялул Сакиншинначитурал комитетрал заседание.
Ва щалагу билаятрал лагрулийсса акцияр, чувшиврий жанну дуллусса вирттаврал аьпа буруччаву мурадрайсса давуртту дуллалисса.
Ванил Попечительский советрал председательнугу ур Аьрасатнал Следственный комитетрал каялувчи Александр Бастрыкин.
Заседаниялий, ларгсса шинал хIасиллугу дурну, гьашину дувантIими давурттая бувсунни, гьаз бунни жагьилтуран патриот тарбия дулаву мурадрайсса агьамсса масъаларттугу.
Заседаниялий махъ лавхъунни Аьрасатнал Виричу НурмахIаммад ХIажимахIаммадовлул нину Сапижат Мазаевалгу. Ванил цила арснаясса «Патриот» тIисса лугу буллунни Бастрыкиннухьхьун.
Заседание дайдишин хьхьичI кьини гьуртту хъанахъими бивунни «Донбассрал хъуручI» тIисса выставкалийн. Ва художник Сергей Марченкол СВО-лул вирттаврал суратру хъуручIрах дирхьусса выставкар.
Шиккува кIицI лаганну, Аьрасатнал муфти щайх Равил Гайнуттиннул оьвкуну, Сапижат Москавливсса Собор мизитравусса ифтарданийгу гьуртту хьушиву. ЛичIину хьунабавкьушиву Аьрасатнал Бусурманнал рувхIаний управлениялул хъунаманал хъиривчу Дамир МухIуттиновлущал. Сапижатлул ванангу пишкаш бувну бур «Патриот» лу, Дамир МухIуттиновлул тIурча, ванин пишкаш бувну бур «Аьрасатнавусса исламрал тарих» тIисса цалва лу.

ПатIимат Рамазанова