Вай гьантрай агьалинащал хьунаавкьунни «Справедливая Россия – За Правду» партиялул региондалийсса отделениялул советрал председатель, ДР-лул Халкьуннал Мажлисрал председательнал хъиривчу Камил Давдиев.

Депутатнащал хьунаакьин Къизлар шагьрулия увкIун ия 2022-ку шинал март зурул 10-нний Мариуполь шагьру мурахас буллалисса талатавурттаву 56 инсан ххассал увсса Айгум Ногаев. Ванал мурад бия «О дополнительных мерах социальной поддержки граждан Российской Федерации, ­призванных на военную службу по мобилизации в Вооруженные Силы Российской Федерации, а также граждан Российской Федерации, принимающих участие в специальной военной операции на добровольной основе, и членов их семей» тIисса закон мюнпат буну зузи даврил ялув ацIаву. Камил Давдиевлул махъ буллунни закон биттур даврил ялув ацIан.
Хасъсса аьралий операциялул иширттаву шамилчин­сса шинай гьуртту хъанахъи­сса ХIамид Мусаибовлул нину ПатIимат Зурпукьанова бувкIун бия сенатор Сулайман Керимовлул чулухасса хасъсса аьралий операциялул гьурттучитурал кулпатирттансса хIажлийнсса путевкардава циннагу дулун кумаг бара тIий. Камил Давдиевлул оьвкунни хIажлийнсса путевкардаха зузисса инсантурайн. Бувсунни ПатIиматлухь цукун­сса документру хIадур бан аьркинссарив.
Депутатнал ва кьини цачIанма бувкIсса инсантурахь бувсунни ДР-лул ЗахIматрал ва социал лябуккулул министерствалучIа бушиву «Все вместе» тIисса цIанилусса хасъсса аьралий операциялул гьурттучитурал кулпатирттан кумаг буллали­сса фонд.
ЦачIанма бувкIсса цинявппагу инсантурал масъаларттал хIакъираву депутатнал бунни хасъсса маслихIатру ва ми ща­ллу бавугу лавсунни цалла къулагъасрайн.
Имара Саидова