СалатрацIун бавхIусса
— Салатрайн бичлачисса чимус мюршну бурувсуну, дуршлагравун бивчуну, ялун щаращиссащин дутIирча, нахIуну бикIайссар.
* * *

— Ахънилсса дурусайни, ишла дувара ссикъабагьай чаннаннил чIила, муххал чIиллул витамин С зия байсса бур.
* * *

— Ахънилсса мюрш дувара пластмассрал ягу чинилул тахталий, тIаннулмунил сок цавунна цIупI тIун дикIайссар.
ТIаннулмур дакъа дакъахьурча, ганихагу къуллугъ бан аьркинссар, щаращисса щинай шюшаван аьркинссар, гьарца ишла дурни, нюжмардий цаллагу цIил къат дирчуну, лишин аьркинссар.
* * *

— Салатравун майонез, барт, ссирка дукан хьхьичI дутIин аьркинссар, 2 ссятрава гайннул тIин зия шайссар. КIива-шанма гьантлий канансса салат дурагу мадувару, гайннуя хайргу бакъассар, цирдагу къанахIуссар.
* * *

— Майонез дирхьусса салатрал ва винегретрал тIин ххуй шайссар, столданий дишиннин гивун лимондалул ккири бутарча.
* * *

— ЧIявуминнан ххирар салатраву лаччул кьанкь. Ва кьанкь даншиврул, сусул ччатIул касакрайх лаччи бувгъун, салатраву битайссар мадара хIаллай, ччатI бувккун махъгу личIантIиссар дахьрасса, тIааьнсса лаччул кьанкь.
* * *

— Нувщи хIаласса салатравун нувщи махъва-махъ бичин аьркинссар, цанчирча нувщи хьхьичIва-хьхьичI зия хъанай байбишайссар.
* * *

— Салатрайнсса ахънилсса ккирттаравура шахьан аьркинссар, чIявусса витаминну яхьуншиврул.
* * *

— Салат чIюлу дан дакьайссар уртту-щин, цIусса нисварти, помидор, кьая, нацIу мамаш, шархьсса къур, чIикIунтIа, шавхьсса ккунук.
— Столданий чIярусса салатру духьурча, цакуцну чIюлу дан къабучIиссар, ккаккан дувара зула фантазия.
НисирацIун бавхIусса
— Аьркин дануксса дакъа нис мадухъару, ми кьакьлан дикIайссар, тIин зия шайссар.
* * *

— Нис холодильникраву дишин аьркинссар фольгалуву ялу полиэтилендалуву дархIуну.
* * *

— Нис къакьакьаншиврул, мунил чIарав бишияра качарданул касак, ялун кьалакьигу лакьияра.
* * *

— Холодильник бакъахьурча, нис цIил щинай атил дурсса аццуву дархIуну хъинссар.
— Кьаркьсса нис цIулаган дан, кIукIлу дан гъили накIливу дишин аьркинссар.
Т. ХIажиева