Февральданул 16-нний ШавкIуллал школалий хьунни аьралуннал-интернационалистътурал аьпалунсса батIаву. Ва сакин дурну дия ингилис мазрал учитель Гульнара ЦIургъуловал, шяравусса Аьрасатнал Халкьуннал аслийсса культуралул центрданул ва библиотекалул зузалтращал цачIуну.
БатIаву дайдирхьунни школалул директор Асли Какваевал авгъан дяъвилул тарихрая бусаврийну. Школалул 7-8-ми классирттал дуклаки оьрчIал щаллу бунни «Офицеры» тIисса балай. Та дяъвилий ливтIуминнал аьпа учин бавтIминнал ххал дунни архиврал кадрардугу хIаласса видео-клипру.
Щалагу Совет Союзрая кунма, ШавкIуллал шяравагу жагьилтал лавгун бивкIссар цалва интернационал бурж лахъан: Кьурбанов Тимур Кьурбаннул арс, Тумалаев Ситтикь Рамазаннул арс, Исмяилов Исякь Рамазаннул арс, Мирзаев Маккай ХIасанхIусайннул арс.
Аьрасатнал Халкьуннал аслийсса культуралул центрданул директор Лиана Халиловал бувсунни Исмяилов Исякьлуя, цувгу «За отвагу» медальданун лайкь хьусса, 1980-ку шинал Кабул шагьрулий коммунистътурал кьюкьравун кьамул увну ивкIсса. Бувсунни, школагу дахьва къуртал бувну, дяъвилийн лавгун, оьрмулул 19 шинаву жан харж дурсса, ивкIуну махъ «ЯтIул ЦIукул» орден дуллусса Мирзаев Маккай ХIасанхIусайннул арсная. Ваналгу, ва кунма, дяъвилул цIарава шаппай зана хьун нясив къабувсса цайминналгу аьпалун минутIрайсса пахъ багьавугу дуруна.
