Февральданул 6-нний Ккуллал райондалийсса СунбатIуллал школалий тIиртIунни Ватандалул мурадру буруччаврил ххуллий чувшиврий жан дуллусса Оьмардул арс Нуруллагь Оьмаровлул аьпалул ула.

Ва тIиртIунни виричу дуклай ивкIсса школалул чIирай. Мероприятиялий гьуртту хьунни Ккуллал райондалул бакIчинал бигарду биттур буллалисса Ажуб ХIусманов, жяматийсса иш­ккаккуАртур Амутинов, СВО-лул Ветерантурал ассоциациялул председатель, Ккуллал райондалийсса «Память гор» тIисса жяматийсса ккурандалул вакил Нураттин Рамазанов, райондалул бакIчинал хъиривчу Анатолий Давдиев, Нуруллагьлул нину Наташа, кулпат, маччачу ЦIаххай Аьлилов, дуклаки оьрчIру, шяраваллил жямат ва чIявусса цаймигу. Вайннал бунни Нуруллагь дакIнин утлатисса, ванал чувшиврия бусласисса ихтилатру.
Мармарчарил улттуя пардав дукьансса ихтияр дуллуна Ажуб ХIусмановлухьхьун ва ЦIаххай Аьлиловлухьхьун. Мероприятиялий гьуртту хьун бувкIминнал аьпалул улттуцI тIутIивгу дирхьуну, минутIрайсса пахъ багьунни.

Аьпалул мажлис тIитIлай, Ажуб ХIусмановлул Нуруллагьлул ниттихь барчаллагь увкуна лайкьсса арс тарбия аврихлу.
– ХIакьину жува абад дуллай буру Ватандалул ххуллий жан дуллусса къучагънал цIа. Вирттал сагъну буссар, ми жунма дакIний буссаксса. Нуруллагь 2004 шинал СунбатIуллал школагу къуртал бувну, дуклан увххуссия Роставуллал паччахIлугърал транспортрал университетравун. Мугу къуртал бувну, зий уссия Дагъусттаннайсса Муххал ххуллул управлениялий. Ватандалул ялун нигьачIаву дирсса чIумал, ванал цала буржну ккавккунни мунил мурадру буруччаврил ххуллий талан, цала хушрай гьан­сса. Нуруллагьгу, ва кунма къучагъну жула паракьатшиврул цIаний жанну дуллусса цаймигу вирттал жунма хъамабитан къабучIиссар. Ватандалул мурадру буручлай жан дуллусса арнацIа хьусса ниттихь учинмур ляхълан къабикIай. ХIурмат бусса Наташай, вил арснал къюву – жулгу къювур. Жу хIарачат банну вил чIарав бацIан, аьркинсса иширттан кумаг бан. Кьянкьа дувара нинухърув, жу мудан зул махъ буссару, – увкунни Ажуб ХIусмановлул.

Хъирив ихтилат бунни Нураттин Рамазановлул:
– Жагьилтал – жула бу­чIантIимурди. Миннал тарбиялухсса жулла къулагъасгу дикIан багьлай бур хъуннасса, хаснура Ватан ххирану тарбия баврих. Жула дусса язимур хъус – му Ватанни.
Нуруллагьлул жан дуллуссар Аьрасатнал аьралийчунал хъалийн хаин къавхьуну, хIакьсса вирттаврал ххуллий. Ва хъанахъиссар Ватандалийн, билаятрайн дакI тIайласса, ялун нанисса никиран эбратрансса къучагъ. Шикку дуклакисса оьрчIан тачIав хъамакъаитантIиссар жула паракьатшиврул цIаний жан дуллусса къучагъ, – увкунни ванал.
– На хьхьичIва-хьхьичI барчаллагь учин ччай ура, ялун нанисса ник Ватан ххирану тарбия даврил чулухуннай хъуннасса къулагъас дуллалисса Ажуб ХIусмановлухь ва СунбатIуллал школалул хъуниминнахь.

Нуруллагьгу, ванал уссугу ттул итталу хъуни хьусса оьрчIру бур. Адаминал къирият ккаккан дан хIадурсса, хьхьичIун бурувгсса оьрчIру бикIайва. Хушрай хасъсса аьралий операциялийн лавгун, Ватандалул мурадру буручлай жан харж дунни Нуруллагьлул. Ванал уссу Назимгу лажин кIялану аьралий бурж барт бигьлай ур. Вай кIиягу билаятралгу ялун бучIантIимунил цIаний жаваблувшинна цайрагу душиву кIулсса оьрчIру бия. Наташай, вин хъунмасса барчаллагьри къучагъсса арсру тарбия баврихлу,– увкунни Артур Амутиновлул.

Нуруллагьлул оьрмулул ххуллия бусласисса ихтилатру бунни учительтуралгу. Виричунан хас дурсса назмурду дурккунни СунбатIуллал школалул дуклаки оьрчIал.
Арснал аьпа буруччаврил ххуллийсса давривух гьуртту хьун бувкIминнахь ва ула лачIун кабакьу бувминнахь барчаллагь тIисса ихтилат бунни Наташал.

Имара Саидова