Дагъусттаннал аьрщарайн ххявхсса террористурал кьюкьри ххит дурну 20 шин шаврин хасну дуллалисса мероприятиярттал лагрулий сентябрь зурул 11-нний Республикалул БакIчи Владимир Васильев ивунни Бущихъиял райондалийн. 1999-ку шинал кIикку цалчинсса къизгъинсса талатавуртту хьуну диркIссар.
В.Васильев хьунаавкьунни ЦIумадиял, Бущихъиял ва ЦIуссалакрал районнаясса ополчентуращал, тай дяъвилул иширттаву гьуртту хьуминнащал, дуллунни Дагъусттаннал ополчентуран му даталуцIун дархIуну итадаркьусса медаллу.
Бущихъиял райондалул бакIчи МахIаммад Патхулаевлул райондалул жяматрал цIания барчаллагь увкунни В. Васильевлухь.
— Жува кIицI лаглагиссару хъуннасса агьамшиву дусса иш.
Оьрмулул хъуниминнан ххуйну дакIнийссар, цукунсса тагьар диркIссарив тани жула паччахIлугърай.Та захIматсса чIумал дунияллул террористурал кьаст лархIуну дия, жула аваданшивурттугу кIунттихьхьун ларсун, жула аьрщарайгу каялувшиву дуллан. Хъунасса шаэр Р. ХIамзатовлул увкусса куццуй, Дагъусттан дагъусттанлувтурацIа бан. Ххуйну хIадур бувсса, ярагъуннил балгусса боевиктурайн кьянкьану данди бавцIуссар зунттал агьлу. Муна му чIумалли хIасул хьусса цIусса хIукумат, цIусса Аьрасат. Билаятрал гьарцагу мурцIния най бивкIссар Дагъусттаннал халкь цала аьрщи дуруччин.
[dropcap]Б[/dropcap]арчаллагь зун цинявннанмагу, — увкунни цала ихтилатраву Республикалул БакIчинал. Ванал кIицI лавгунни цукунсса гьурттушинна дуллай буссарив дагъусттанлувтал республикалий хъанахъисса дахханашивурттавух. Бувсунни, «100» ва «150 школа» тIисса проектру щаллу дуллай, дакI цIуцIисса дагъусттанлувтурал кумаграцIух чIявусса школарду бакьин бан бювхъушиву.
— Та дяъвилий ккаккан дурсса къучагъшиврулгу, укунсса ххаллилсса давуртталгуру жува цачIун буллалисса, — увкунни ванал. В. Васильевлул бусласимунийн бувну, ларгсса шинал мартрай Дагъусттаннайн увкIсса чIумал, зунттал районнал агьалинал оьрмулул даража гьаз бансса тапшуршиннарду дурну дур Владимир Путиннул. Муния махъ В. Васильевлул дуллунни дяъвилий гьуртту хьуминнан тай иширттан 20 шин шаврин хасну итадаркьусса медаллу.
А. Аьбдуллаева
