Дагъусттаннал аьрщарайн ххявхсса чапхунчитурал кьюкьри ххит дурну 20 шин шаврицIун дархIусса личIи-личIисса мероприятияртту
хьунни Ккурккуллал школалий, Культуралул къатлуву ва шяраваллил библиотекалий.
1999 шиналсса дяъвилул иширттан хас дурсса батIаву хьунни шяраваллил Культуралул къатлуву. ЧIирай сакин дурну дия дяъвилул лахIзарду ккаккан буллалисса стенд. ЦIуссалакрал, Бущихъиял, ЦIумадиял районнай най бивкIсса дяъвилул иширттая, ЦIуссалакрал райондалул милицалтрал та ппурттуву ккаккан дурсса къучагъшиврия бусласисса ихтилат бунни Культуралул къатлул художествалул каялувчи Аймисай Аьбдуллаевал.
— Та шинал Дагъусттаннал чиваркIуннал хIат-хIисав дакъасса чувшиву ккаккан дурссар. ЦIуссалакрал райотделданул 32 милицанал къучагъшиврий жанну дуллуссар чапхунчитурайн данди бавцIуну. Миннан чIявуминнан аьпалул хьуну махъ Къучагъшиврул орденну дуллуссар. КIиннан – Халид Мурачуевлун ва Мутай Исяевлун дуллуссар Аьрасатнал Вирттаврал цIарду. Жула халкьуннан мудангу дакIний бикIантIиссар жула вирттал, жагьилсса никиран вай яхIирал ва чувшиврул эбратну хьун аьркинссар, — увкунни ванил цила ихтилатраву.
Шяраваллил библиотекалул хъунмур Сияли Аьбдуллаевал сакин дурну дия «Жун ччай дур дакьаву» тIисса цIанилусса луттирдал выставкагу.
