Юрий Чайкал ва Сергей Меликовлул ххал бивгьунни Дагъусттаннай ва Чачаннал Республикалий тIабиаьтрал апатIрал биян бувсса зараллу бухлаган баврил хIакъиравусса масъалартту.
Апрельданул 3-нний АьФ-лул Президентнал СКФО-райсса вакил Юрий Чайка къуллугърал аьрххилий увкIунни МахIачкъалалийн. Республикалул бакIчинащал ва федерал ведомстварттал вакилтуращал цачIу президентнал вакил ивунни чявхъагъараллал зараллу биян бувсса объектирдайн. Юрий Чайка ивунни мукуна МахIачкъалаливсса «Приморская» подстанциялийнгу, ва бакьин буван тамансса хIарачат буллай бур МЧС-рал пишакартал. ЦIанасса ппурттуву подстанция зий бур муданмасса низамрай.
Тагьарданущал кIантту-кIанттурдай кIул хьуну махъ, миннал дунни хьусса зараллу бухлаган баврил хIакъиравусса батIаву
Дагъусттаннал МЧС-рал Ситуациярттал центрданий Юрий Чайкал ва Сергей Меликовлул вичIи дирхьунни шагьрурдая ва районная бувкIсса зараллу бивсса инсантурал бусласимуних.
ВКС-рал низамрай МахIачкъала, Буйнакск шагьрурдал ва Хасавюртуллал райондалул бакIчитурал бувсунни тIабиаьтрал апатIрал биян бувсса зараллая ва ми бухлаган баву мурадрай дуллалисса давурттая.
БатIаврий гьартану бувсунни лирмур ччаннай дацIан даврил ва паччахIлугърал бансса кумаграл хIакъираву.
БатIаврий махъ лахълай, Юрий Чайкал бувсунни Ухссавнил Ккавкказуллал субъектирттай мартрал 27-нний гьавалул тагьар хъинну даххана хьуну диркIшиву. Ванал тIимунийну, чIярусса гужсса гъараллу лачIаву ва гужсса марч сукку шаву сававну, кучарду ва цаймигу кIанттурду щинахьхьун лавгун бия. ЛахIунттив дурцуну дия, инфраструктурартту пасат хьуну дия. Бюкьан бувну бия 8 азарваксса къатри, сайки 6 азарда тIювалуцIунсса учасокру, сайки 350 машинарттал ххуллурдал кIанттурду. Зия хьуну бур 17 машинартту лагайсса, 16 инсантал лагайсса ва 2 муххал ххуллу лахъайсса ламурду, лиян бувну бур транспортрал ххуллурду, электроэнергиялул ва газрал сетьру.
«Округрал субъектирдал паччахIлугърал властьрал органнал цила чIумал дурсса давурттайн бувну, контрольданийн ласун бювхъуну бур шикку хьусса захIматсса тагьар, инсантал оьрмурдацIа хьун къабивтун бур, лявкъуну бур инсантал чIумуйну битансса кIанттурду, бювхъуну бур щинахьхьун лавгсса кIанттурдая халкь буккан буван, ми щинал дузал буван, зараллу хьусса кIанттурдайсса халкь щинал, дукиялул, электроэнергиялул ва газрал дузал буван», – увкунни Юрий Чайкал.
Дагъусттаннал бакIчинал бувсунни цIанасса чIумал тагьар цукунсса дуссарив, личIинурасса тагьар хьусса кIанттурдай цукунсса давуртту дуллай буссарив, гъараллал ва мурчал биян бувсса зараллу бухлаган баву мурадрай.
Масъалалия ихтилатру бунни мукунма исполнительный властьрал регионнал ва федерал органнал вакилтуралгу. Чачаннал Республикалийсса тагьардания бувсунни ЧР-лул ХIукуматрал председательнал хъиривчу Рустам Шаптукаевлул.
Юрий Чайкал бувсунни зараллу бухлаган баврин хасну дуллалисса давуртту къуртал дуван аьркинну бушиву ччясса чIумул мутталий. Ванал мукунма кIицI бунни яла ччясса чIумул мутталий хасъсса ХIукуматрал комиссиялийн тIайла буккан аьркиншиву циксса зараллу арцуйну бивну буссарив тасттикь буллалисса документру.
