ЧIярусса гъараллу ларчIун, щин ялтту ларгун, инсантурал къатри, хъус щинаву лирчIсса иширттацIун бавхIуну, республикалий баян бунни ЧС-рал (чрезвычайная ситуация) режим.

АцIрахъул къатри лирчIунни щинал лув. ЧIявусса дагъусттанлувтал хьхьу-кьини къаувкуну, хушрай кумаг буллай бия зарал бивсса инсантуран. «Мы вместе» тIисса штабрал ­активистътал Граждан обороналул ЧС-рал ва щалагу ­Аьрасатнал студентътурал корпусрал ххассалбувултращал, «Молодая Гвардия «Единой России» суккушиннарал активистътуращал зий бия щинавун бювкьсса кIанттурдай. Волонтертал кумаг буллай бия лувчIинния ва квартирардава щин дуккан дан, инсантал щин ялтту лавгсса кIанттурдая буккан бан ва щинал ласун бувсса левкьсса кIанттурду бакьин бан.

Ттуршунния ливчусса волонтертал зий бия МахIачкъалалив захIматсса тагьардануву ливчIсса агьалинан кумаг буллай. ХъачIунттай щябивтун буккан буллай бия щин ялтту ларгсса кIанттурдава мюрщисса оьрчIру, кумаг буллай бия зарал бивми чIумуйсса бацIансса пунктру хIадур бан. Шагьрулул ххассалбувултращал ми гьуртту хьунни МахIачкъалаллал 56-мур школалий тIивтIусса чIумуй бацIансса пунктрайн зарал бивсса инсантал биян буллалисса, миннан гьарицаманан аьркинсса кумаг буллалисса давурттаву. Волонтертал бия зарал бивминначIан генераторду, шану-кIараллу диян дуллай.
Гъараллал зараллу биян бувсса кIанттурдай зий бур «Добровольцы Дагестана», «Волонтеры-медики», «Молодая гвардия «Единой России», ВКСК ва цаймигу жагьилтурал жяматийсса организацияртту.

БувкIунни республикалийн цайми регионнаясса ­волонтерталгу.
«Единая Россия» партиялул сипталий най дур «Антипаводок» тIисса акция. Щин ялтту гьансса нигьачIаву дусса кIанттурдай сакин бувну бур мугьлат бакъа зун бикIайсса группарду.

Андриана Аьбдуллаева