МахIачкъалалив, Дусшиврул къатлуву, хьунни Росгвардия сакин бувну 10 шин шаврин, мукунна ихтиярду ва низам дуруччаврил аьрал сакин бувну 215 шин шаврин хас бувсса шадлугърал мажлис.
Шикку гьуртту хьунни Дагъусттаннал Росгвардиялул управлениялул хъунама, полковник Вадим Кузнецов, национал гвардиялул МахIачкъалаллал соединениялул аьралуннал командирнан кIанайсса полковник Максим Апарович, Дагъустттаннал ХIукуматрал председательнал хъиривчу Рамазан ЖахIпаров, республикалул гужирдал структурардал каялувчитал, диндалул вакилтал, Росгвардиялул зузалт ва миннал кулпатру, къуллугърал ветерантал, къуллугърал бурж бартбигьлай жанну дуллусса Росгвардиялул зузалтрал ва аьралийтурал гъан-маччами.
Мажлис байбишиннин Дусшиврул къатлул хьхьичIсса майданнив ккаккиялун дирхьуну дия хасъсса техника, фойелуву – Росгвардиялул ярагъ ва экипировка.
Мажлис тIивтIунни Вадим Кузнецовлул. Ванал кIицI лавгунни ацIра шинал лажиндарай нацгвардиялул аьрал билаятрал мюхчаншиву дуруччаврил ххуллий ца хъуннасса хъар лархъун бушиву, вай агьалинал вихшаласса къалхъанну ва жяматийсса низам дуруччаврил ттарцIну хъанахъишиву. Вадим Кузнецовлул дакIнин бивчунни билаятрал мюхчаншиврул цIаний жанну дуллусса аьралийтал.
– Вайннал чувшиву жунна абадлий дакIний дикIантIиссар Ватандалийн ва цала къуллугърайн тIайлашиврул лишанну. Жулва буржри вайннал кулпатирттаха аякьа дуллан. Барчаллагь вай тарбия бувсса нитти-буттан, – увкунни ванал. Хъирив баян бунни къучагътурал аьпалун минутрайсса пахъ багьаву. Вадим Кузнецовлул барчаллагь увкунни къуллугърал аьдатру ирсирай дачин дурсса, жагьилсса никиран пиша лахьхьин кумаг буллалисса къуллугърал ветерантурахь.
Ихтилат къуртал буллай, ванал дакIнийхтунусса барчаллагь увкунни Росгвардиялул зузалтрахь ва аьралийтурахь чувшиврухлу, къуллугърал буржру дакI марцIну бартбигьлагьаврихлу. Лавайсса кьимат бивщунни региондалул паракьатшиврул ва билаятрал мюхчаншиврул цIаний вайннал бихьлахьисса захIматран.
Хъирив ихтилат бунни Максим Апаровичлул. Ванал кIицI лавгунни гьарица кьини, терроризмалущалсса ва экстремизмалущалсса, сакиншиннарайсса тахсиркаршивурттащалсса талатаврил ххуллий, мукунма хъуннасса агьамшиву дусса объектру буруччавриву Росгвардиялул зузалт ва аьралийтал багьа бищун къашайсса даву дуллай бушиву. Му бакъассагу, вай хасъсса аьралий операциялий Ватандалул мурадру буручлай бушиву.
Республикалул каялувчитурал цIания Росгвардиялул зузалт пишалул байрандалущал барча бунни вице-премьер Рамазан ЖахIпаровлул. Ваналгу кьадру-кьиматрай кIицI лавгунни низам дуруччаврил, билаятрал ва агьалинал мюхчаншиврул цIаний вайннал лархъун нанисса хъар.
Росгвардиялул зузалт ва аьралийтал мукунма барча бунни республикалул гужирдал структурардал каялувчитурал, духовенствалул вакилтурал.
Ихтилатру къуртал хьуну махъ хьхьичIунсса зузалтран дуллунни ПаччахIлугърал, республикалул ва ведомствалул наградартту. Къуртал хьунни мажлис ххаллилсса концертрайну. Концертрал программалуву гьуртту хьунни Росгвардиялул МахIачкъалаллал соединениялул аьралий оркестр, Дагъусттаннал ФСБ-лул Дазул управлениялул ансамбль, «Дагестан» тIисса балайлул ва къавтIаврил паччахIлугърал ансамбль, «Ватан» тIисса оьрчIал ва мюрщи жагьилтурал ансамбль, Дагъусттаннал эстрадалул чанна цIуртти.
