Мартрал 28-нний Дагъусттаннай гъараллу ларчIуну, халкьуннан биян бувсса зараллая бусласисса, цаннияр ца асар хьунсса видеортту дия соцсетирдаву.
Муданна кунна ва ххуллухьгу щинавун дахьларгунни ЦIуссалакрал райондалийсса чIяруми щархъурду. ЦIуминалийсса ЦIуссалакрал райондалий гъараллу лачIаврицIун дархIусса тагьар укуннагу оьлуркъусса дур. ЦIанагу, ссуттихуннай ларчIуну диркIсса гъараллал бярду кьакьан бувану бур. Утти миннул ялун кIивахъул гьантлий, дацIаву дакъа, гъараллу ларчIунни. Тамансса щархъурду чани бакъа лирчIуну дур. ЦIуссалакрал райондалий гъараллу сававну хIасул шайсса тагьар кIулну, вай иширттал ялув ацIаву цала бакIрайн лавсунни райондалул бакIчи МаматIи ХIамзатовлул.
Зараллу хьуминнан кумаг буллай, хъунмур хъар лахъан багьунни ЦIуссалакрал райондалийсса энергетиктурангу. Вайннал бригадарттал анаварсса мутталий чаннал дузал дунни щархъурду. «Новострой» ЖКХ-лул хасъсса техникалущалсса зузалтрал бригардартту бацIаву дакъа зий бия машинарттал ххуллурду, кIичIиртту щинацIа мурахас буллай.
Райондалул бакIчинал сипталийн бувну, хIасул бувсса оператив штабрал вакилтурал кумаг буллай бия хIаятирттава, багъирдава щин дуккан дан ва инсантуран ялапаршиннарал шартIру дузал дан. ЦIанасса ппурттуву ЦIуссалакрал райондалул цинярдагу щархъурду ттукIрал дузал дурну дур.
Ххишаласса зарал хьуну бур ЦIуссаккуллал ва Чапаевкаллал шяраваллавусса ххуллурдан, багъирдан. Шиккугу «Новострой» ЖКХ-лул зузалтрал насосру дирхьуну, щинал къанаврду марцI дуккан дуллай, хъунмасса захIмат бивхьуну бур. Къатран цичIав зарал къавхьунни тIий бур шикку ялапар хъанахъисса инсантал.
«Ххуллурду, багъру бувцIуну бур щинал, ша бизансса кIану бакъар. Тамансса хIаллай чани бакъа бивкIру. МахIачкъалалив, Хасавюртлив, Буйнакскалий ва цаймигу кIанттурдай инсантурайх дурксса кьини ккавккун махъ, гъалгъа тIун пайда бакъар. Ци чулийгу Аллагьнал кумаграйну ва ххуллухь кьювкьуну ххассал хьушиврун ккалли буллай буру», – тIий бур ЦIуссаккуллал жямат.
Мяйжаннугу, жула инсантуран хар-хавар бакъасса тIабиаьтрайнусса бала-апатIру ялун бивунни. Дагъусттаннал халкьуннал вай кьинирдугу чумартну лархъунни, ккаккан дунни цала инсаншиву ва иш багьний чIарав бацIан хIадурну бушиву. Ца лахIзалий къатта-къушницIа, хъус-кьинилуцIа хьуну ливчIунни инсантал. Цукунсса, ци бала ялун биярчангу, жула инсантурал дугъришиврул, узданшиврул хIат-хIисав дакъар. Цаннай ца яржа бакъа, кьини дурксса инсантуран хIачIайсса щин, гъилисса дукра диян дуллай бивкIунни. Машинартту, ичIаллил техника дакьин дан хIадурну бушиву баян буллай бия. Цикссагу инсантал бия цалва генераторду лавсун бувкIун, щин дуккан дуван кумаг банну тIисса. Кувгу бия зараллу хьуминнан уквасса юридий маслихIатру бан ччай буру тIисса. Кьини дурксса инсантурал дард-хажалат чансса дунугу куклу дуллай, чIарав бацIлай бивкIунни Дагъусттаннал агьали.
Имара Саидова
