Ларгсса нюжмардий Р. ХIам­затовлул цIанийсса Национальный библиотекалий хьунни «Ттул ватан – Дагъусттан» цIанилусса выставка тIитIлатIисса шадлугъ.

Ва хъанахъиссар худож­никтурал-любительтурал, цивппа личIи-личIисса касму-сянатирттал заллухърусса, амма сурат дишаврихсса ччаврил цачIун бувсса инсантурал выставка.

Ваний ккаккиялун дирхьуну дия МахIачкъала, Дарбант, Каспийск шагьрурдаясса ва Буйнакскаллал, Къарабудахккантуллал, Лакрал райннаясса 11 художникнал дирхьусса 60-нния лирчусса суратру.
Выставка хьунни республикалул «Самородки» тIисса арт-проектрал лагрулий. АцIнияхъайсса шиннур цайнува цивппа хьусса художниктал ялун личин баврил, вайннал чIарав бацIаврил ххуллий зузи дурсса проектран. Ванивух гьуртту хъанахъимигу шиная шинайн чIяву хьуну най бур.

Выставка дурну дия Дагъусттаннал Культуралул министерствалул, Республикалул Халкьуннал творчествалул къатлул.
Ва тIитIлатIисса ихтилат бунни Дагъусттан Республикалул культуралул министрнал хъиривмур, Республикалул Халкьуннал творчествалул къатлул директор Марита МухIадовал. Ванил кIицI лавгунни ларгсса шинал «Самородки» проектрал лагрулий 10 мероприятие хьушиву, ва шин, тIурчан, дайдирхьушиву «Ттул билаят – Аьрасат» тIисса хъуннасса выставкалийну, ва кьинимур выставкагу ватандалухсса ччаврил барашиннану хъанай душиву.

Ихтилатру бунни Дагъусттаннал Художниктурал союзрал председатель Кьурбанаьли МахIаммадовлул, Жамаллул цIанийсса Художествалул училищалул директор Мухтар Камбулатовлул, «Дагестан» ГТРК-лул шеф-редактор Ссалам Хавчаевлул ва чIявусса цайминнал. Ихтилатчитал кIицI лаглай бия ва выставкалий гьуртту хъанахъисса художниктурал гьунар, ляличIишиву, лавайсса даражалий дирхьусса суратру. Мяйжаннугу, ва выставкалийсса суратру дия ца ккарккун вамур хъамакъаритансса.
Выставкалий гьуртту хьусса художниктал лайкь хьунни Дагъусттан Республикалул Культуралул министерствалул чулухасса дипломирттан.
Ва ххуллухьмур выставкалий гьуртту хъанахъисса 11 художникнава 6 ия цалчин гьуртту хъанахъисса. Вайннавух ГьунчIукьатIрал дянивмур даражалул школалул директор Малик Къушиевгу.

– Ва выставкалий гьуртту хьу тIисса сипталущал ттуйн бувккуна Республикалул Халкьуннал творчествалул къатлул директор Марита МухIадова. На ваниннин тачIав чувчIав выставкалий гьуртту хьуну акъаяв. Сурат дишаврихсса гъирарив оьрчIниява бур, дакIний дур нара цалчин дирхьусса суратру. Бунияланурив сурат дишаврихун на агьссара школалий лавайми классирттаву, рисованиялул дарсру жухьра, аьпа биву, Дандамаев Сулайман Шамсуттиновичлул дихьлан ивкIукун. На суратру дишара маслолух, акрилданух, дишара инсантурал суратру (портретру), пейзажру, натюрмортру.

 

Выставкалийсса давурттава ттун яла-яла гъира бия шяраваллил диц-куцру думи суратру дишин. Натюрмортру дихьлангу хъунмасса гъира бикIай, цанчирча шикку хъунмур хIарачат бикIайну тIий материал, фактура чIалачIи дуван. Пейзажру ккаккан буллалисса чIумал игьалагара, ххирар экспериментру буллан. Портретру дихьлахьисса чIумаллив, аварану, ттуятува нава рязи акъа икIара, чIяруну дахханаххи дуллангу багьай. Шиннардил хьхьичI агьну уссияв оформительский давурттахунгу. Хъинну ххарира ттула чIарав бацIан гъан-маччами, дустал, даврил уртакьтал, шяраваллил инсантал бучIаврия. Выставкалий кIул хьура ттунна кунна сурат дишаву ххира хьуминнащал, любительтуращал, кIул хьунни гихунмай сурат дишавриву ттунма мюнпатну бацIансса цIусса затру.
Хъунмасса барчаллагь культуралул министр Зарема Ажуевнан, Марита Велихановнан, выставкалул куратор Жамиля МахIаммадован ва цайминнан ва проектрахлу, ттулла творчествалущал чIявучивун уккан дуллусса кашилухлу, – тIий ур Малик МахIаммадович.

Бадрижамал Аьлиева