Аьрасатнал президентнацIунсса Дагъусттаннал Постпредствалул барча дунни, цалчинмур ранграл капитан, профессор ХIусман-ХIажи Аьлиевлул 90 шинал юбилей. «ХIакьину, мартрал 17-нний, Москавлив яхъанахъисса ца яла хIурмат лавайма дагъусттанчунал, цалчинмур ранграл капитан, профессор, Сулайманнул арс Аьлиев ХIусман-ХIажинал юбилейри.
Увссар ва ЧIарттал шяраву. 1954 шинал увхссар дуклан С.М. Кировлул цIанийсса ЯтIул ттугълил лаваймур аьралий-хьхьирил училищалувун. Ва къуртал бувссар 1958 шинал.
1958 шиная тIайла хьуну, 1964 шинайн ияннин, ЛухIи хьхьирил флотрал аьралий жамирдай къуллугъ буллай ивкIссар, «Благородный», «Гризон» тIисса жамирдал командирну. 1956 шинал Ухссавнил флотрал «Лениннул комсомол» тIисса щинал лултту дуккай атом лодкалул командирнал хъиривчуну ивкIссар.
1968 шинал ванал мусил медальданий къуртал бувссар Лениннул цIанийсса Аьралий-политикалул академия. Вава академиялуву философиялул кафедралул хъунама преподавательну зий ивкIссар.
1980 шинал, январьдания тIайла хьуну, шанна шинайсса зий ивкIссар Авгъанисттаннал Аьралий гужирдал политикалул хъунмур управлениялул маслихIатчину. Гьуртту хьуссар аьралий иширттавух, щаву дирнугу ивкIссар. Ванал хъуннасса даву дурссар, совет аьралуннал ва авгъаннал аьралуннал талаталтрал оьрмурду ябаву мурадрай.
1983 шинал ХIусман-ХIажи Сулайманович ивтссар Аьралий академиялул кафедралул хъунаманал хъиривчуну. 1992 шиная шинай кIицI лавгсса вуз-рал профессорди», – укун тIий бур барча аврий.
Постпред Владислав Толстюклул гихунмай кIицI лаглай ур, ХIусман- ХIажи Аьлиевлул оьрмулул ххуллу Ватандалуха ва элмулуха хIакьну къуллугъ баврил эбратну хъанахъишиву. ЛухIихьхьирил флотрал хIаписарнал, командирнал, педагогнал ххуллу ванал лажин кIялану бивтшиву, иширачIа чувшиву, кьянкьашиву, тIайлашиву ккаккан дурсса ушиву. ЛичIинува кIицI лаглай ур аьралийтал хIадур бавриву хъунмасса бутIа бивхьушивугу, 35 шинал лажиндарай цимирагу ник Ватан дуруччин хIадурсса, билаятрах ччаву дусса аьралийтурал тарбия дуршиву.
Постпред барчаллагьрай ур ванайн, мудангу жяматийсса оьрмулул иширттавухгу чялишну хIала уххайсса хIаписар, профессор унутIий, ванал маслихIатрайсса мукъул кьиматгу лахъсса буну тIий.
ПатIимат Рамазанова
