Мартрал 2-нний «Дагестан» РИА-лий хьунни Дагъусттаннал УФАС-лул (Управление федеральной антимонопольной cлужбы) каялувчи Кьагьир Бабаевлул пресс- конференция. Муний ванал бувсунни ларгсса шинал дурсса давурттал хIасиллая.

2025 шинал Дагъусттаннал УФАС-лул (Антимонополь управление) контроль буллалисса циняв бутIраву законну лиян даврихлу дирхьуну дур 100,7 млн къурушрансса аькIри. Административ жаваблувшиврийн кIункIу увну ур 301 къуллугъчи. Лахъан дурну дур 59,1 млн къурушрансса аькIри.
2025 шинал Дагъусттаннал УФАС-рал ххал бивгьуну бур антимонополь законну лиян даврил хIакъиравусса 79 аьрза. Сукку дурну дур 10 дело конкуренция дуруччаврил хIакъираву. Миннувасса 7 дело ахирданийн диян дурну дур, хасъсса хIукумурдугу кьамул бувну, 3 дело дацIан дурну дур закон лиян даву къаляркъуну, 7 делолул хIакъираву хIукму кьамул бувну бур закон лиян дуршиву мяйжан бувну.
Буллуну бур диялдакъашивуртту духлаган дуван аьркиншиврул хIакъиравусса 2 чагъар, кIивагу биттур бувну бур.
Мукунма, дукIу властьрал 7 органдалун ва кIанттул цилакаялувшиврул органдалун баян баву дурну дур (предупреждение) щаллу бан аьркинмунил хIакъираву. Миннувасса 4 биттур дурну дур, 3 къадурну дур. Мунийн бувну, кIанттул цилакаялувшиврул органнал хIакъираву сукку дурну дур закон лиян даврийн багьайсса делорду.
Ларгсса шинал судрайн буллуну бивкIун бур 5 иск паччахIлугърал ва муниципал предприятияртту лакьаврил хIакъираву, миннул дуллалисса давуртту даркьуну дакъану тIий АьФ-лул законнал тIалавшиннардицIун.
Дагъусттаннал УФАС-рал Арбитражрал судрайн буллусса циняв искру судирттал дузрайн буккан бувну бур. Ларгсса шинал Дагъусттаннал УФАС-рал ххал бивгьуну бур личIи-личIисса даражарттал хъус-хъиншиву ласаврил (закупкардал) хIакъиравусса 1138 аьрза. Ведомствалул буллуну бур ляркъусса диялдакъашивуртту духлаган дан тIалав буллалисса 620 чагъар (предписание). 2025 шинал Дагъусттаннал УФАС-лийн дуркIун дур 182 лабизаву къатIайлану зузисса (недобросовестные) поставщиктал реестрданийн лахъан баврил хIакъираву. Ххал дигьаврил хIасиллайн бувну, РНП-лийн (Реестр недобросовестных поставщиков) ларсун дур 96 предприятие, къаларсун дур – 86.
Подрядчиктураща (поставщиктураща) бюхълай бакъасса бур бакIрайн ларсъсса контрактру бартдигьин. Мунийн бувну, цила чIумал биттур къадурну дур национал проектру, махъуннай бюджетравун зана хьуну дур ишла къадурсса арцу ва биттур къабувна ливчIун бур хьхьичI бивхьусса масъалартту.
2025 шинал УФАС-рал зузалтрал дурну дур 800 пландалий дакъасса хъиривлаяву, миннуйну ххал диргьуну дур 1000-нниха лирчусса закупкарду, буллуну бур диялдакъашивуртту духлаган даврил хIакъиравусса 94 чагъар.
Ахирданий Кьагьир Бабаевлул жавабру дуллуна журналистътурал буллусса суаллахьхьун.

ХIасан Аьдилов