Лакрал райондалийсса КIамахъаллал ва Ппалассуннал шяраваллал администрациялул хъунаманал къуллугърайн уттигъанну хьусса бувчIавурттаву шяраваллал депутатътурал дянива увчIунни Ппалассуннал шяраватусса Руслан МахIаммадов.

Увну ур Руслан 1959 шинал. Дуклай ивкIун ур Ппала­ссуннал байбихьулул, Уриннал 8 шинал школардай. ЛивчIсса кIива класс къуртал бувну бур Гъумучиял ва ГьунчIукьатIрал школардай. Яла дуклан увххун ур МахIачкъалаллал Автодорожный техникумравун. Польшанаву аьрали буржгу лавхъун, зана хьуну, МахIачкъалалив техникум къуртал бувну бур. Яла зун ивкIун ур Къизлардал электросетирдай. 1985 шинал дуклан увххун ур Ордженикидзеллал (цIана Владиккавкказуллал) шяраваллил хозяйствалул институт­равусса энергетический факультетрайн. Тагу къуртал бувну, зий ивкIун ур МахIачкъалалив «Дагэнерголий». Муния махъгу ишбажаранчину цалва маэшат цува буллай.
— Руслан, уттигъанну жяматрал вихшала дирхьу­сса депутатътурал дянива ина увчIунна жаваб­лувсса, ва захIматсса заманнай жяматрайн багьайсса чIявусса масъалартту щаллу бан ба­гьантIисса къуллугърайн. Цукун­сса, ци даражалул масъалартту бур кIирагу шяраваллаву? Ссая дайдишин тIий ура вилла даву?
— Мяйжаннугу, къабигьа­сса чIун дуркIун дур аьмну билаятрангу, хъирив регионнангу. Амма укунсса журалул къуллугърайн увкIсса гьарналвагу мурад бикIан аьркинни цайва бивхьусса умуд, вихшала биттур дувансса хьхьичIва-хьхьичI. Хъунма махъ буслан ччай акъара, ва ттигу дайдихьу дур. ДайлитIулул чIалачIи банссар. Цалсса, жямат­ращал цачIу, бавкьуну дансса давуртту цагу-кIирагу дакъар. Лаккуйсса КIамахъаллал шяраву хIакьину ялапар хъанай бур кIива кулпат, Ппалассуннал шяраву тIурча бур ряхва кулпат. Хъунмур жямат жул яхъанай бур Бабаюртуллал райондалийсса Сангардал шяраву. Шикку бур 83-84 къатта, школа-интернат, культуралул къатта. Вай махъсса 10-15 шинал дянив шагьрурдай ялапар хъанахъисса кIамахъал-ппалассуннал цавайннал дурну, цавайгу дуллай бур цIу-цIусса къатри. КIамахъалив жяматрал цала хушрай бакьин бувну бур щарнил мизит. ДакI ххари хьун­сса иш ца бур – жямат Лаккуйнмай кIункIу тIий, буттахъал аьрщарах мякь бувккун, кIий къатри дан ччисса чансса ба­къар. Жагьилмигу бур, бугьарамигу бур. ЦIана ттул хьхьичI бивхьусса агьаммур масъалагу бур кIирагу шяравун щин дуцинсса. Щин дакъа, му кIинттул чIумал микIлачIлай, хъинну аварану бур кIий яхъанахъими. Сангардайгу вава щинал масъала бур. Шяравалу хъунна хъанай, жямат чIяву хъанан бивкIукун, духмур артезиандалул гуж биял къахъанай буну тIий, дуккан багьлай бур цамур артезиан. Ва даву дангу щарнил бюджетрацIух къабю­хъан тIий бур. Мунияту луглай ура спонсорнах. Ххал банну цукун шайрив. Лаккуйсса КIамахъал-Ппаласмавсса ххуллурду оьккину бакъар. Хъинну ххуйну зий бур Лакрал райондалул ххуллурдал участокрал управление. ХьхьичIва жучIан Гъуниннал райондалийх гьан-бучIан бигьану бивкIхьурча, цIана Гъумучату бур ххуйсса ххуллу бувну. Хъунмур масъала ци бур учирча, кIицI лагавияв, гьар кIанай кунма, аьрщарацIун бавхIумур масъала бушиврий. ЦIана ттучIа бур шагьрурдай ялапар хъана­хъисса кIамахъаллаясса къатри дан аьрщив дулара тIисса мурадращалсса 18 аьрза. На ми гьан буллай ура Гъумукун, тиччагу ми тIайла буклай бур Лаващав, гикку буну тIий ми суаллу ххалбигьайсса идара. Аьрщарал закон дакъахьувкун, щархъал циняр аьрщив ккаллийну дур сельхозугодиялул аьрщаран. Поселение дувансса ихтияр дакъа тIий, бюхълай бакъар къатри дан ччи­миннан, таний щарнил хъу-лухччив диркIсса, цIана машина гьаз хьун рахIатсса кIанайсса, аьрщив дулун. Ппалассуннал щарнил дянивсса кIанугума бур сельхозугодиялул аьрщаран хIисавну.
Яла дан дакIнийсса давур­ттавух кIицI лаган ччива гьашину Сангардай тIитIин ччай бушиву ФАП (фельдшерско-акушерский пункт). Бурганну жула хIал-ахIвалданух.
Шиккува барчаллагь учин ччива, цалчин, ттула чIарав бацIан хIадурсса ттулва жяматрахь, кIилчин, барчаллагь учин ччай ура ва даврил дайдихьу дуван ттуцIунма кабакьлакьисса Лакрал райондалул администрациялул хъунаманал хъиривчу Абакар Къюннуевлухь ва райондалул финотделданул хъунмур Аьйша Сулаймановахь. Нагу ттула чулуха хIарачат банна ттуйра вихшала дирхьуми пашман къабан.
— Барчаллагь, Руслан! ТIайлабацIу баннав вингу му цIусса къуллугърай.
Залму АьбдурахIманова