Ва хьунни цалва миллатгу, мазгу ххирасса, лакку мазрал бучIантIимуний дакI цIуцIисса ва му ябансса чаран ляхъла­хъисса хIакьсса патриотътурал хьунабакьаву.

Уттигъанну дунияллийн бувк­сса «Лакрал магьри» тIисса лу­ттирдугу, ца-кIира шинал хьхьичI укунма цила харжирацIух
итабавкьусса «Мюрщи щаращал щурщу» тIисса оьрчIансса назмурдал луттирдугу библиотекалун ва дук­лаки оьрчIан бахшишран лавсун бувкIун бия Мариян Илиясова. Презентациялий гьуртту хьун бувкIун бия «Дараччи» клубрал член, искусствовед Гулизар Султанова, халкьуннал шаэр Ссугъури Увайсов, шаэр Миясат Щурпаева, кIицI лавгсса луттирду суратирттал чIюлу бувсса художник Ажу Къячаев, университет­рал преподаватель Хазина Аминова, Лакрал радиолул редактор Тамара Закарьяева. БувкIун бия мукунма МахIачкъалаллал школардай лакку мазрал дарсру дихьлахьисса учительтал, библиотекарттал зузалт, дуклаки оьрчIру. Мажлис тIитIлай, библиотекалул зузала Заза ХIасановал бувсунни батIаврил мурад, бувсунни махъ нанисса, дурккусса, хьхьичIунсса лакрал хъами бавтIун сакин був­сса «Дараччи» клубрая ва мунил дурсса чумартсса давурттая.
— 1963 шинал чIирисса тиражрай бувккун бивкIсса МахIам­мадхан Пашаевлул сакин бувсса «Лакрал магьран» цIуну дуниял тIиртIуну, ххаллилсса даву дунни Мариян ЧIибиевнал. Вагу, ванияр цаппара шиннардил хьхьичI итабавкьусса «Мюрщи щаращал щурщу» тIисса оьрчIансса назмурдал лугу канил бувгьунал дакIру ххари дан­сса луттирду хьунни. Марияннул хIарачатрайну дунияллийн був­ккунни ниттихъахасса шеърирду цачIун бавтIсса ца ттигу лу. Ми цивппагу Мариян ЧIибиевнал бахшиш буллай бур шагьрурдайссагу, лакрал шяраваллаву­ссагу школардан, библиотекар­ттан. Вагу хъанай дур «Дараччи» клубрал гьану бивзния мукьах, 17 шинал лажиндарай, лакку мазгу, лакрал культурагу ядаву мурад­рай дурсса ххаллилсса давурттавасса ца.
«Дараччи» клуб буссар лакран мюнпат бусса гьарицагу даврил чIарав. Вайннал кумаграйнур цIуну итабавкьусса лакку мазрайсса букварь ва орфографиялул словарь, Лакрал театрданул сахIналийн буккан бувсса «ПартIу ПатIима». ПартIу ПатIима бувччусса кIанай Хьурттал шяраву зиярат тIивтIусса, яла-яла лакрал хъун шагьрулийн Гъумукун нанисса ххуллий ПартIу ПатIимал гьайкал дацIан дурсса. Вай давурттал, жула тарихрал кьимат гьаз баврицIун, ялун нанисса никгу буттал улклух ччаву дуну тарбия дуллалиссар. 17 шинал мутталий клуб лайкь хьуну бур цикссагу наградарттан: дипломирттан, грамотарттан, барчаллагьрал чагъардан, — увкунни Зазал.
Дуклаки оьрчIахь лакку мазрай гъалгъа тIутIияра, лакку маз ябувара, жулва авадансса тарихгу, цIанихсса виртталгу кIулну бикIияра тIий лабизлазисса ихтилат бунни Гулизар Султановал.
— Зун жулва цIанихсса тарихгу, къучагъсса виртталгу кIулну бикIаншиврул, зувун жулва мазгу, культурагу ядансса гъира-гьавас бутаншиврул итабавкьунни клуб­рал вай луттирду.
Ттун ччива зу дяъвилий къучагъну талай бивкIсса, элмулул ххуллий хьхьичIуннайшивуртту дурсса, гьарица чулуха гьунар бу­сса жулва буттахъан лайкьну оьрму бутлай, — увкунни ванил.
Мариян ЧIибиевнал бувсунни Дагъусттаннай дяъвилул ишру нанисса, давуртту дакъасса, харжру, пенсияртту къабуллалисса захIматсса чIумал гьану бивзун бивкIшиву «Дараччи» клубрал. Буттал кIанугу, ниттил мазгу ххирашиврул гьуз учин бувшиву цуппа му бигьа дакъасса даву бакIрайн ласун. Ванил барчаллагь увкунни цилва пикрирду дузрайн буккан бан мудангу цила лагма лавгун бивкIсса дустурахь.
Библиотекалун ссайгъатран вай луттирду лавсун бувкIсса Мариян Илиясовахь, мукунма ва мероприятиялий гьуртту хьун бувкIсса цинявннахь барчаллагь тIисса ихтилат бунни библиотекалул хъунмур Зулпат Шахшаевнал.
Ххуйну хIадур хьуну бувкIун бия ва мероприятиялийн МахIачкъалаллал 16-мур школалул, 1-мур ва 13-мур гимназиярдал, 6-мур музыкалул школалул дуклаки оьрчIру. Вайннал дур­ккунни лакрал шаэртурал назмурду, увкунни лакку балайрду, бувсунни кIицI лавгсса луттиравасса магьри. Гьар мудан кунма, ва мероприятиялийгу цинявннан дакI даркьунни Аьлиева ПатIиматлул хIадур бувсса 16-мур школалул дук­лаки оьрчIай.
ЧIалай бур, хIакьину шагьрулул школардай лакку мазрал дар­сру дихьлахьисса учительтурангу оьрчIан цалва ниттил мазрах­сса гъира бутан хъунмасса захIмат бихьлан багьлай бушиву. ЧIявуми кулпатирттаву оьрчIахь лакку мазрай гъалгъа тIий бакъар.
Махъ итабавкьусса ниттихъахасса шеърирдал луттирава чIалай бур гьунар бусса оьрчIру жучIава чансса бакъашиву. Миннавун хъиннува гьавас бутансса даву хьунни ва лу итабакьаву. ХIакьину школардан аьркинсса луттирду буккан бансса арцу итакъадакьлакьисса чIумал, цила харжирацIух вай луттирду итабавкьуну, Марияннул авадан бунни оьрчIал биб­лиотекартту. Укун ххаллил­сса давурттив уттиния тихуннайгу дуллансса цIуллушиву дулуннав «Дараччи» клубрахьхьун ва мунил президент Мариян Илиясовахьхьун.