Хъун дакъасса Къичурлухиял шяравату Хъун дяъвилийн лавгун ур 38 чув-адамина. Миннава 19 ливчIун ур аьраяллил майданнай. Ххинугу къачанну чIалай бур Ххувшаву ласаврил ххуллий хIайп къакуну харж бувсса Къичурлухиял жяматралмур бутIагу.
Мува бутIувун бухлахисса бур Амирханхъал агьлу-авладраясса шама уссил бувтсса шанма оьрмугу.

Хъуна-хъунама – Исяев Амирхан

ИвкIуну ур дяъви байбивхьуну цалчинсса шинала, оьрмулул 31 шинаву, ца 6, цагу 2 шинавусса арсругу махъ кьабивтун. Шяраву, сайки бусаларду бувну, буслан бикIайва тIар мунал ххуй-хъиншиврия ва чумарт-чувшиврия, Къичурлухун цалва аьрххи-ххуллий, дахху-ласулул иширай бувкIсса инсантал, хъамал, цайминнахун багьан къабивтун, буцайсса бивкIун бур цаннийнма хъамалу. ХIакьину МахIачкъалалий хъинну чIявуссаннан кIулссар Амирханнул ххаллилсса арсру – Ися ва АхIмадхан, чумартшиврул ва узданшиврул бутIа буттая ирсирай бивсса.

Лявма – Исяев ХIасан

ИвкIуну ур, аьраяту сагъну-саламатнугу увкIун, оьр­мулул 32 шинаву, 6 шин дяъвилул цIаравугу дурну. Дяъви байбивхьусса чIумал, ХIасан дуклай ивкIун ур Киеврай, аьра­яллил медициналул училищалул курсантну. Гиччава лавгун ур аьрайнгу. Дяъвилий мунал бакIрачIан букъавкIсса къаливчIун бур: дирну дур арулла-мяйра щаву, цимилагу контузия хьуну дур, агьну ур цимивагу госпитальданийн. Талатавурттаву дур­сса къучагъшивурттахлу мунал ларсун дур «ЯтIул ЦIукул» орден. Мунан дуллуну дур капитаннал чингу. Ца ххуллух госпиталданий лахъи лавгун, шаппай чагъар чичинсса мажал къавхьуну, муная тIар-хавар бакъа хьуну бивкIун бур мяйва барз. Ахиргу, чагъар бувкIсса чIумал, ивкIусса извещениялул ча­гъар ххай, мунал ца бакъа ба­къасса ссин ххал къахьуншиврул мадарасса хIаллай лабивтун бивкIун бур. Буслай бур, мунал ссу ХIабибатгу ца-кIия чувнал багьасса, яхI-къириятрал заллу буссия тIий.

ЧIавама – Исяев Нуруллагь

ЧIана-чIавама уссу Нуруллагь, ваца чIун дакъанура ливтIусса кIиягу уссихлу куна, яхьуну ур 82 шинай. Амма цувама буттацIа хьуну ивкIун ур увну бувагу 40 гьантта хьусса чIумал. Цал Ккуллал райондалий, яла МахIачкъалалив Нуруллагь зий ивкIун ур мюхчаншиврул органнай. Органнаву зузиссаксса хIаллайгу, шяраву хъу-лухччи ххину яхъанай бивкIсса цала тайпа-тухумрал цIа-бакI сававну, мунан чIявусса бухIангу багьну бур. 1948-кусса шинал, Чапаевкаллал колхозрал собраниялий, цан Нуруллагь акъа къачру тIий бавцIуну, жяматрал му увчIуну ивкIун ур цала колхозрал председательну. Амма органнавату итакъаакьлай, Нуруллагьлул 4 барз бувну бивкIссар тIар кIивагу кIанттай зий. Председательшиврий уссак­сса хIаллайгу мунал дурну дур ххуй-ххуйсса давурттив хIакьинугу халкь дакIнийн дичлайнма бур.
Бунагьирттал аьпа баннав, та оьхIалсса дяъвигу лавхъун, дяъвилул чIунгу дурхIуну, жунна Ххувшаврил бюхттулсса байран кьадиртсса цинявнналвагу!
Жул корр.