Лакрал театрдануву хьунни хасъсса аьралий операциялул гьурттучи, Луганскаллал драмалул театрданул артист Александр Александровлул бувсмунил гьанулий Яна Ореховал чивчусса «Щак багьсса лахIза» тIисса пьесалиясса спектакльданул премьера. Пьеса лакку мазрайн бувцуну бур Зулайхат Тахакьаевал. 

Пьесалуву ккавкчунал бусавурттайну, аьщуйн щуну, аьч бувну бур хIакьсса ишру. Гьаз бувну бур тарихрал гъагъарисса лахIзардаву мяърипатрал ххуллу язи бугьаврил ялув байлсса ххуттай бавцIусса суаллу.
Постановка чулийн буккан бунни режиссёр Руслан Лариннул. Ванаща бювхъунни кьянатсса оьрмулул кьисса сахIналул мазрайн буцин. Спектакльданул ахттар буллай бур экстремал шартIирдавусса инсаннал нярал тагьар. Аьралий ишру ккаккан баврицIун, спектакльдануву хаснува агьамсса ххуттай аьч буллай бур талатиминнал психологиялул чIу, щала чIун ца кIунтIливун лаглагисса цуппа тана та лахIза.

Спектакльдануву гьурттуну ур увагу кIия аьскар: Саша (Дагъусттаннал лайкь хьусса артист Ислам МахIаммадов) ва Яра (актер Мурад АьбдурахIманов) – кIиягу цала хушрай хасъсса аьралий операциялий ватандалул мурадру буруччин лавгсса актертал. Вайннал аьмсса кьадарданул гьанулий ккаккан дурну дур оьрмулул яла захIматсса лахIзалуву язи бугьан багьсса ххуллу. Чувшиврул ва нигьал дянивсса кIюласса дазу. Нигьал ва хьуллил дянивсса оьрмулул кьимат. БивкIулийн лажинну бавцIусса лахIзалий я тарг чин къабувну, билаятрал ялун бучIантIимунил, цала пикрирдал ва чIаравманал цIаний хьхьичIунмай бачинсса дакIнил кьуват ва гьавас цаву бусса инсантал. Пьесалул цIа цурда хъанай дур геройтурал цала дакIнивусса къалмакъалну, гьамин ва лахIзалул батIул дуллай дур цала оьрму ххассал бансса инстинкт аькьлу-кIулшилул кьукьлакьисса виричушиврия, банбит бухлагаву – хьул-умудрая.

Дяъвилул ишру спекэффектрайну ккаккан дурну дия Рена ХIасановал хIасул дурсса сценографиялул. СахIналийсса детальлу чансса душиврийн бувну, тамашачитураща куртIну лаласун бюхълай бия артистътурал симанну, чурххал пластика ва персонажтурал цала дакIнищалсса талатаву. Спектакль байбивхьуну къуртал хьунцIа сахIналий бия так кIива ранг – цIан ва чаннал тIиму, хIукму кьамул буллалисса лахIзалий цIаннава чайннайн дуклакисса талаталтрал симанну. Костюмру – къуллугърал жапасса шартIирдал мугьру бивщусса аьралий форма.
Спектакльданул музыкалул каялувчи Эмилия ШихрахIимоваща бювхъуну бия ккаккан дан ляличIисса хасшиву. Постановкалул саундтрекрал кIачIа буллай бия хъанахъимур: пIякь-шякьлил, бита-ххитаврил чIурду ва нигьачIисса хIукму кьамул буллалисса лахIзалийсса паракьатшиву.

Тамашачитал кIицI лаглай бия аьщуйн щусса актертурал даву агьамсса лахIзалий залдануву дагьлагьисса паракьатшиву. Спектакль ххал бан бувкIсса МахIачкъала шагьрулул 6913-мур аьралий частьрал аьралитал мукIру хъанай бия цанма цалчин баллай бушиву сахIналия аьдадасса лозунгру дакъа, инсаннал къюву ва яхI-къирият ккаккан дуллалисса аьралий гьалмахтурал уссушиврул буржираясса гъалгъа. Постановкалул му ккавкми пикри буллали бунни яла кIусса хIасратрал хьхьичI лахIан бан къабавцIусса инсаннал дакIнил гьавас.
«Щак багьсса лахIза» спектакль бишаврийну Лакрал театрданул ккаккан бунни чIумул тарг ва жула заманнул ватан дуруччултрал никирал хьхьичIсса хIурмат.