Июль зурул 4-нний (2015 ш.) бувксса №343 Аьрасатнал Президентнал хIукмулийн бувну, ЦIуссалакрал райондалул судрал председательну ивтунни ХIамзатов ХIамзат Бижаевич. ХьхьичI ва ЦIуссалакрал райондалул мировой судьянал къуллугърай уссия.

Уттигъанну ЦIуссалакрал райондалул администрациялул къатраву хьунни цIуну ивтсса председательнащалсса хьунабакьаву. Ванащал архIал райондалул жяматращал хьунаакьин увкIун ия ДР-лул Верховный судрал председательнал хъиривчу Артур Орцхановгу. БатIаврий гьуртту хьунни райондалул судрал коллектив, райондалул мировой судрал аппарат, гужирдал структурардал зузалт, чIаххувсса районнал судирттал председательтал.
Шикку ихтилат буллай, Артур Орцхановлул бувсунни утти­нин ва къуллугъ бачин бувну ивкIсса ва му даврий хъунмасса захIмат бивхьусса Хаваев Абакар ГъазимахIаммадовичлуя. Цалва ихтилатраву ванал, мукунма, кIицI лавгунни цIана ва къуллугъ тапшур бувсса ХIамзат Бижаевич райондалий даврил опыт бусса судья хIисаврай кIулну ушиву, ванал цалва къуллугъ дакI марцIну бартбигьланшиврийн умуд бушиву.
Ихтилат къуртал буллай, ванал барча унни ХIамзат Бижаевич цIусса къуллугъращал, чIа увкунни тIайлабацIу ва хьхьичIуннайшивуртту. ХIамзат Бижаевич цIусса къуллугъращал барча уллалисса ихтилатру бунни ЦIуссалакрал райондалул бакIчи ХIажи Айдиевлул, ДР-лул Халкьуннал Мажлисрал депутат Зайнулла Мирзоевлул. Цалва ихтилатраву ХIажи Айдиевлул кIицI лавгунни хьхьичIма председатель Абакар Хаваевлул чIярусса шиннардий ва къуллугъ лайкьну бачин бувну ивкIшиву, му хIакьинусса кьинигу архIал зузиминначIа ва райондалул агьалиначIа бусраврай ушиву. Ахирданий ихтилат бунни цала ХIамзат ХIамзатовлулгу. Ванал барчаллагь увкунни цайнма ва къуллугъ вихшала бувсса Верховный судрал председатель Руслан Мирзоевлухь ва мунал заместитель Артур Орцхановлухь.
— На хIарачат банна хьхьичI­ма председатель Абакар Гъази­махIаммадовичлул кунна, ттуйнна дурсса вихшала лайкь дан ва ттулва къуллугърал бигарду дакI марцIну биттур буллан, — увкунни ХIамзат ХIамзатовлул