Ноябрьданул 6-нний МахIачкъалалив Къумукьнал театрдануву хьунни цIа дурксса хирург, СССР-данул медициналул элмурдал Аьрасатнал академиялул член-корреспондент Рашид Аскерханов ниттил увну 95 шин шаврин хас бувсса щалагу Аьрасатнал конференция.

Бадрижамал Аьлиева
Рашид Аскерхановлущал архIал зий бивкIсса, пахрулий му цала учительнан ккалли уллалисса цикссагу хIакинтал бавтIун бия ва кьини му дакIнийн утан, мунаясса аьпалул махъру учин. Жулла республикалиями къахIисавну, Аьрасатнал личIи-личIисса регионная конференциялувух гьуртту хьун увкIун ия 45 хирург.
Конференциялул даву дайдирхьунни Р.П. Аскерхановлул цIанийсса Медициналул центрданул гендиректор, Дагъусттаннал паччахIлугърал медициналул академиялул факультет хирургиялул кафедралул заведующий ХIамид Аскерхановлул.
Конференциялувух гьуртту хъанахъиминнахь чабувкру тIисса Дагъусттан Республикалул БакIчи Рамазан АьбдуллатIиповлул чулухасса махъру бувккунни респуб­ликалул вице-премьер ХIасан Идрисовлул.
— Дагъусттанлувтал пахрулий буссар хьхьичIунсса цалва ватанлувтурая. Мукунминнавасса цану хъанахъиссар профессор, медициналул элмурдал доктор Рашид Аскерхановгу. Мунал цIа машгьурну дуссар, Аьрасатнал медициналул ва элмулул общественностран дакъа­ссагу, дазул кьатIувгу. Цалла хъиривлаявурттайну мунал дагъусттаннал медицина цукссагу хьхьичIуннай дурссар, ляличIийсса сакиншинначинал гьунарданийн ва лекъащайсса гьавасрайн бувну, мунаща бювхъуссар хирургиялувусса цува заллусса направлениялий каялувшиву дуван. Рашид Пашаевичлул хIадур бувссар цикссагу машгьурсса хIакинтал, медициналул элмурдал кандидатътал ва доктортал.
Юбилярнал хьхьичIунсса элмийсса даврия буслай бур мунал лавайсса даражалий дурсса хирургтурал 9 съездрал, Дагъусттаннал Хирургтурал общество ва хирургтурал элмийсса къуллугъ сакин баврил. Дунияллул лагрулийсса цIа дусса аьлимчунан 95 шин шаврин хасну щалагу Аьрасатнал конференция бавугу хъанахъиссар мунал да­гъусттаннал халкьуннал ва щалагу Аьрасатнал хьхьичI цалла даву ххишала дакъа ларайну дуршиврул мукIрушиннану, — тIий бия Респуб­ликалул БакIчинал цIаниясса адресрай.
Хъирив махъ лавхъунни ДР-лул цIуллу-сагъшиву дуруччаврил министр Танка Ибрагьимовлул. Цалва ихтилатраву ванал кIицI ларгунни Рашид Аскерхановлул дурсса хьхьичIунсса давурттив, мунал биялалийн бувну тIивтIушиву Дагъусттаннай хирургиялул цикссагу отделенияртту, 1958 шинал мунал, Дагъусттаннай цалчинма-цалчин, бувшиву къюкIлийнсса захIматсса операция, чирчушиву 400-нния лирчусса элмийсса давуртту. ЧIурчIав дунни укунасса хIакинная тIайла хьуну, РАМН-рал академикнайн ияннинсса захIматсса ххуллу бивт­сса Рашид Пашаевич ивкIшиву чIявуминнансса эбратну.
— ХIакьину залдануву щя­бивкI­сса чIявуминнаща бюхълай бур пахрулий кIицI лаган цивппа мунащал хIала-гьурттуну бивкIшиву, муначIа дуклай, мунал лекциярттах вичIилий, мунащал зий бивкIшиву, — увкунни Т. Ибрагьимовлул.
Хъирив мунал бувсунни цIа дурксса хирургнал арс ХIамид Аскерхановлун дуллалишиву Бюх­ттулсса Петрдул цIанийсса награда, региондалул агьалинал цIуллу-сагъшиву дуруччавриву бивхьусса хъунмасса захIматрахлу. Мунан мукунна дуллунни лишан «Отличник здравоохранения РД».
КIира кьинисса конференциялий ихтилатру бувми ялагу чIявуя. Конференциялул давриву хъунмасса кIану бувгьуна элмийсса бутIулгу. Мунийн бувну хьунни хирургиялул личIи-личIисса бутIрайн бувсса секциярттал заседанияр­ттугу.