Дарбантуллан 2000 шин шаврил лагрулуву, 2015 шинал хьунадакьинтIисса му юбилейрал хьунийн, республикалий дуллай бур цикссагу давурттив, щаллу дуллай бур хъунисса проектру. Ца мукунсса даву хьунни вай гьантрай МахIачкъалалив Р. ХIамзатовлул цIанийсса Миллатрал библиотекалувугу — Регионнал дянивсса этнокультуралул смотр — Аьрасатнал халкьуннал аслийсса культуралул центрдал.
Фестиваль-смотр сакин дурну дия АьФ-лул Культуралул министерствалул, ДР-лул Культуралул министерствалул, Республикалул Халкьуннал творчествалул къатлул, Миллатрал библиотекалул МахIачкъала шагьрулул администрациялущал ва Культуралул управлениялущал, ДР-лул Жагьилтурал иширтталсса байсса министерствалущал цачIуну, республикалул муниципал сакиншиннардал гьурттушиврийну.
Смотрданул лагрулуву хьунни Аьрасатнал халкьуннал культуралул «Этноподворье» цIанилусса выставка. Муний ккаккиялун дирхьуну дия хьхьичIарасса экспонатру, ичIура ишла дуллай бивкIсса кьай-кьуй, матахI, миллатирттал лаххия, луттирду ва м.ц.. Выставкалий бюхълай бия миллатирттал дукрардал тIин-тIааьн ххалбувангу. Ккаккан дунни концертрал хъуннасса программагу. Байрандалувух гьуртту хьунни МахIачкъалаллал шагьрулул искусствалул 9-мур школданул чIава художникталгу.
Фестивальданийн бувкIунни ДР-лул Халкьуннал Мажлисрал председатель Хизри Шихсаидов, ДР-лул культуралул министр Зарема Буттаева ва м.ц..
Шикку махъру лавхъунни ДР-лул культуралул министрнал хъиривчу, Республикалул Халкьуннал къатлул директор Марита МухIадовал, ДР-лул жагьилтурал иширттал министр Заур Кьурбановлул.
Фестивальданувух гьуртту хьунни республикалул шагьрурдаясса ва районнаясса фольклорданул коллективру, Къарачай-Чаргаснал, Чачаннал, Ингушетиянал, Къабардин-Балкарнал республикарттаясса творчествалул коллективру.
Культуралул аралувусса уртакьшиврийсса зузаву, ва фестивальданул сакиншинначитурал пикрилийн бувну, хъанахъиссар миллатирттал дянивсса нахIушиву, паракьатшиву дуруччаврил ца ххуллуну. Ухссавнил Ккавкказуллал инсантуран му хъинну ххуйну бувчIлайгу бур. Мунияту, щаллу дуллайгу бур цачIу художествалул ва творчествалул проектру, миннуйну щаллу буллай бур ва аралувусса «культуралул диалогру». Хъуннасса агьамшиву дур вай проектру щаллу давривух гьурттуну чIявусса жагьилталгу бушиврул. Ва кьинисса тамашачитуравухгу бия цикссагу жагьилтал.
