Дуклаки оьрчIан жулла райондалийгу, щалва билаятрай кунна, къуртал хьунни дуккаврил шин. ЦIана най дур гъинтнил каникуллу. ТIайлассар, гъинтнил каникуллай дуллансса давур­тту ризкьилуха зузисса кулпатирттаву чансса къадикIай. ЦIанасса заманнай чIявур кулпатру, ризкьи-кьини дакъассагу, минначIасса оьрчIру оьнма бикIай. Оьнмасса оьрчIал дянивату ччай-къаччай, тIулдакъашивурттугу личлан дикIайссар.

Мунийн бувну на УО-рал чулуха ва «Илчи» кказитрайхчIин цинявппагу нитти-буттахъайн, школалул учительтурайн, директортурайн оьвтIий ура, оьрчIащалсса бигьалагаврил, зузаврил даву сакин дан аьркинссар тIий.
ЦIана дур тIитIлай Дагъус­ттаннал Республикалул агьамшиву дусса пионертурал лагерьду. Миккун тIайла бу­ккаврил хIакъираву УСЗН-лул чулухасса баян бавугу дия З. МахIаммадовлул. На жула Ду­ккаврил управлениялул чулухагу баян буллай ура школардайгу, нитти-буттащалгу пионер лагерьдайн гьан баврил чулухуннайсса бувчIин баврил даву гужлан дан аьркиншиву.
Директортурал, классрал каялувчитурал ччясса мутталий хIадур буван аьркинссар лагерьдай бигьалаган ччисса оьрчIру. Миннал нитти-буттащал кьутIи дан аьркинссар. Тавакъю буллай буру июньдалул 7-ннин рязишинна дусса оьрчIал сияхI (аьрзардащалсса) УО-райн диян даву. Ми жучIан дирну махъ, нитти-буттахъул аьркинсса документирттащал кIулгу бувну, аьркинмур тIалав дантIиссар. Жу ялугьлай буру информациялух.
Юсуп ХIусайнов, Ккуллал райондалул КIулшиву дулаврил управлениялул пишакар