[dropcap]Ш[/dropcap]иная шинайн мукIру хъанай бура Ххувшаврил байрандалул кьадру ва хIурмат лакрал миллатрал дянив ляличIинува бюхттулсса бушиврий.Мукун бушиву исват шай Хъун дяъвилия зана къавхьуминнансса гьайкаллахсса аякьалийну. ХIакьинусса кьининийн Лакрал райондалий царагу шяравалу лирчIун душиву къакIулли ватандалухлу жанну дуллуминнансса гьайкаллу жяматрал цала каширдацIух цIу дуккан къадурсса.
Зулайхат Тахакьаева
МахIачкъалалия бувккун, Лакрал дазуйн бухханнин личIину итталун къадагьай Ххувшаврил байрандалун хас дурсса я транспорантру, я ттугъру, я вирттаврал суратру. Лаккуйн буххайхту тIурча, асар хъанай дуссар ми гьарца зат.
Миллатрал аьдад хIисав дурну, лакрал дянивату аьрайн лавгун бур щиярчIавнияр ххишаласса чиваркI, виртталгу бувккун бур цайминнаяр ялттусса. Мунийн бувну тIийгу бухьунссар Ххувшаврил кьинилул кьадру жучIава ххишалассагу.
![](http://ilchi.beget.tech/wp-content/uploads/2019/05/59756765_2149468265101543_1.jpg)
Гьарца шинал кунна, чIявусса агьлугу бувкIун, лахъа-хъунсса даражалий дунни гьашинугу Гъумук Ххувшаврил парад ва байрандалул шадлугъру.
КIюрххилла датIлан диркIуна Гъумучиял паччахIххуллийн лакрал ххюягу Виричунал ва ватан дуручлай бивкIсса ттаттахъал суратирттащалсса, транспорантирттащалсса ва тIутIал кацIурдищалсса дуклаки оьрчIал дасттарду. Лагма-ялтту чIюхлай бия дяъвилул шиннардил балайрду.
Дяъвилун бувсса кумаграхлу паччахIлугърал Обороналул комитетрал райондалун тапшур бувсса ЯтIул Ттугълищал ва Совет Союзрал Вирттаврал – АхIмад-Хан Султаннул, Ризван Сулаймановлул, ХIажи Бугъановлул, Якьуб Сулаймановлул, ЦIаххуй Маккаевлул суратирттащалсса кьюкьа зюннав-дачIулущал дуркIуна дяъвилия зана къавхьуминнан дацIан дурсса гьайкалданучIан.
Лакку мазрай парад дачин дурну бия райондалул магьирлугърал къатлул зузалт АьлихIажи Щамххалов ва Шамсият Какваева.
Парадрай гьуртту хьунни Лакрал райондалул бакIчи Юсуп МахIаммадов, ванал хъиривчутал, идарарттал хъуними, шяраваллал администрациярттал бакIчитал, школарттал директортал, учительтал ва дуклаки оьрчIру.
БувкIун бия ва ххуллухгу лакрал миллатрацIун бавхIусса агьамсса цавагу иш чIарах итакъабакьайсса жула биялчувталгу: Ссапар Аьбдуллаев, Султан ЦIаххаев, Рапи Абакаров, Сайпуллагь Аьвдуразакьов, Кисловодскалия гьарца шинал учIайсса Аьлил АхIмадов, Аслан Къажлаев ва чIявусса цаймигу.
Парад тIитIлай, Юсуп МахIаммадовлул увкуна:
— Лакрал райондалия аьрайн лавгун ур 6000 чув, миннава 1500 – цала хушрай. 3200 ливчIун ур дяъвилул майданнай. ЧIивисса лакрал миллатрава увккун ур Совет Созрал 6 Виричу. Цанная хьуну ур кIийла Виричу. Лакрал райондалия шамуннал лавсун бур Виричунал цIуку – Ризван Сулаймановлул, ХIажи Бугъановлул, Якьуб Сулаймановлул.
КьатIаллил билаятирттайгу, кIанттул патриотътуращал хъачIрай хъачI дирхьуну, талай бивкIссар Читтуратусса ХIасан-ХIусайн Камалов ва Ххюлусматусса ХIусайн Кущаев. ХIасан-ХIусайн Камалов хьуссар Италиянал Виричу, ХIусайн Кущаев – Франциянал Виричу.
Ххувшаву ласун хъунмасса кабакьу бувссар захIматрал фронтрай гьуртту хьуминналгу. Дяъвилун бувсса кумаграхлу Лакрал район лув-ялув мукьийлла лайкь хьуссар СССР-данул Совнаркомрал чулухасса Занази ЯтIул Ттугълин ва лув-ялув шамийлла – ПаччахIлугърал обороналул комитетрал чулухасса Занази ЯтIул Ттугълин ва му абадлий ливчIссар райондалухь. Вана хIакьинугу му Ттугъ жулла шадлугъ чIюлу дуллай, жулла дакIру пахрулул ва ххаришиврул дуцIин дуллай, — увкуна Юсуп МахIаммадовлул.
Хъирив дяъвилия зана къавхьуминнал рухIирдаяту кьулгьу-алхIам бувккуна Гъумучиял мизитрал имам МахIаммад-Маннар Бариевлул.
КIирагу райондалул аьрали комиссар ХIасан Масуевлул бувсуна Хъун дяъвилий Лакрал райондалул чиваркIуннал дурсса гьурттушиндарая ва виричушивурттая.
Ихтилатру бувуна ялагу Даниял Магьдиевлул, Рапи Абакаровлул, Зулайхат Макьсудовал, Даниял Мусаевлул.
Дяъвилул шиннардин, Ххувшаврин, вирттавран хас дурсса назмурду дурккуна Гъумучиял ва Щардал школарттал дуклаки оьрчIал.